Radiomik aamma TV-imik naammaginnissimaarneq annertuumik qaffariartoq

KNR-ip ukiumoortumik naammaginnissimaarnermik misissuinerata takutippaa, innuttaasut KNR-imik aamma KNR-ip aallakaatittagaanik naammaginnissimaartut. Allaat naammaginnissimaarneq sumiiffippaalunni malunnaatilimmik siuariarpoq.

- Tulluusimaaqaagut. Misissuinerup takutippaa, tamaviaarluta sulinerput aamma innuttaasunit tigulluarneqartoq, suliagut aammalu maanna taamatut ineriartornerput iluatigineqartoq, tamannalu soorunami nuannaarutigaarput, pisortaaneq Karl-Henrik Simonsen oqarpoq.

Aallakaatitsisarnerit ilusii aallakaatitsisarnerillu piffissalersorneri KNR Radio-p 2016-imi allanngortippai, taamaattumik KNR-imut pissanganarpoq takussallugu, allannguinigut innuttaasunit qanoq tiguneqassanersut. Siunertarineqartoq tassaavoq innuttaasut uummaarinnerusumik radioqartinnissaat, tassani tusarnaartartut akuliunniarnerullugit toqqaannarnerusunillu ullutsinnut tunngasunik tusarnaagaqartillugit. Taamaalilluta ullormut nal. akunnerini 3-ni 4-ni nutaanik aallakaatitsisariarluta 2016-imi ullormut nal. akunnerini 11-ni nutaanik aallakaatitsisalerpugut isumalluutissagut amerlinngikkaluarlugit

Radio:

Radiomik tusarnaartarnerit katinneri 2016-imi ullomut nal. akunnerinit 5,5-init nal. akunnerinut 4,9-nut appariarput. Taamaattoq KNR-radiomik tusarnaartarneq 2015-imitulli qaffasitsigaaq, tassaasoq ullormut nal. ak. 4,2. Tassani angusat paasinarsisippaat, radiomik tusarnaartarnerit katinnerisa appariarnerat sumiiffinni tusaataannik aammalu nunat allamiut radioannik tusarnaartarnerit appariarsimanerinik. Radiomik tusarnaartartut 95%-ii KNR-imik tusarnaartarput.

Kalaallisut nutaarsiassanik aallakaatitsisarnerit tusarnaartartut 85 %-iisa naammagisimaarpaat naammagilluarlugilluunniit, 2015-imi naammaginninneq 75 %-iuvoq, tusarnaartartut 86 %-iisa danskisut nutaarsiassanik aallakaatitsisarnerit naammagisimaaraat naammagilluarlugilluunniit.

Radiomik tusarnaartarut 85 %-iisa KNR-imi radiukkut aallakaatitaat naammagisimaarpaat naammagilluarlugilluunniit, tamanna 2015-imut sanilliullugu qaffariarneruvoq, taamani 70 % naammaginnissimaarmata naammaginnilluarlutilluunniit.

Radiukkut aallakaatitakkat ataasiakkaarlugit pillugit tamanut tunngatillugu naammaginninneq qaffasissuuvoq.

- Isumaqarpugut tamassuma takutikkaa, aallakaatitsisarnitta allanngortinnissaannik toqqaanerput assersuutigalugulu Inatsisartut ataatsimiittarnerinik aallakaatitsisarunnaarluta, toqqaannartumik nutaaliaasunik pitsaassusilinnik taarsiinerput iluatsilluartuusoq., pisortaaneq Karl-Henrik Simonsen oqarpoq.

TV:

TV-imik isiginnaartarnerup katinnera 2015-imi ullomut nal. ak. 5,2-mit 2016-imi nal. akunnerinut 4,5-mut appariarpoq. KNR-imik isiginnaartarneq 2015-imi isiginnaartarnerup assigiinnangajappaa. Taamaattumik angusat kingumut paasinarsisippaat, isiginnaartarnerit appariarnerisa kanalinik allanik isiginnaartarnerit appariarnerinik pissuteqartoq.

Innuttaasut 88 procentii ullut tamaasa TV-mik isiginnaartarput, taakkunanngalu 94 procentit KNR-imik isiginnaartarput.

Isiginnaartartut 79 %-iisa TV-ikkut nutaarsiassanik aallakaatitassiat naammagisimaanngikkunikkit naammagilluarpaat, 2015-imut sanilliullugu tamanna 64 %-init qaffariarnerulluni.

KNR-TV-ikkut aallakaatitassiat isiginnaartartut 65 %-iisa naammagisimaarpaat naammagilluarlugilluunniit. Tamanna 2015-imut sanilliullugu qaffariarneruvoq, taamani 50 % KNR-imi aallakaatitat naammagisimaarmatigit.

KNR.gl

KNR-ip nittartagaa innuttaasut 25 %-iisa minnerpaamik sap. akunneranut ataasiarlutik atortarpaat. Atuisartut 78 %-iisa nittartakkap imai naammagisimaarpaat naammagilluarlugilluunniit, taavalu atuisartut 70 %-iisa nittartakkami radiop aamma TV-ip imaannik naammaginnillutik naammaginnilluarlutilluunniit.

Taamaattoq qaammammit qaammammut takusinnaasarparput, knr.gl-ikkut TV-imik isiginnaartartut, radiomik tusarnaartut aammalu nutaarsiassanik atuartartut amerliartortut. KNR Radio live stream 2016-imi 900.000 missaannit iserfigineqarpoq.

- Ataatsimut isigalugu kisitsisit nuannaarutigisatsinnik kusanartuupput. Tamassuma KNR-imik siuarsaanitsinnik unitsinnavianngilaatigut. Suliniutinik nutaanik pilersaaruteqarpugut taamatullu nuannerusumik ineriartortitsineq ingerlateqqinniarparput, pisortaaneq naggasiivoq.

Naammaginninnermik misissuineq tamakkerlugu uani atuarsinnaavat: http://knr.gl/files/knr_seer-_og_lytterundersogelse_rapport_2016_070417.pdf

 

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!