Politiit: Radiukkut atortorissaarutit nutaat pillugit neqeroortitsisoqalersoq
Nunatsinni politiit radiukkut attaveqaqatigiissutigisartagassaannut nutaanut Naalagaaffiup politiivi ukiup ingerlanerani neqeroortitsissapput. Upalungaarsimasut nittartakkakkut aviisiat, Beredskabsinfo.dk taama allaaserisaqarpoq.
Kalaallit Nunaanni politiit FM radiukkut aaqqissuussineq atorlugu radiukkut attaveqaqatigiissutigisartakkatik qanganitsersimasut ukiorpaalunni atorpaat. Politiilli taakku atorlugit illoqarfiit nunaqarfiillu akornanni attaveqaqatigiissinnaanngillat.
AAMMA ATUARUK Politiit radiui qanganitsertut ilungersunartut
Tamatumunngalu taarsiullugu politiit Nuummi vagtcentralimut sianerlutik nalunaarutinik pissarsinngikkunik ingerlatitseqqittarput.
Taamaammat atortorissaarutissat oqarasuaammut attavikkut nalinginnaasukkut allanut matoqqatinneqartukkut imaluunniit attaveqaatikkut taakkununnga pigitinneqartukkut ingerlanneqartassapput.
Aammattaaq atortorissaarut nutaaq oqarasuaatit angallattakkat ullumikkut attaveqarfigisanngisaanni attaviluffigisaanniluunniit atorneqarsinnaassaaq, Nuummilu vagtcentralimut attavilerneqarsinnaalluni nillertorujussuarmi atorneqarsinnaassaaq.
Taamaammat Naalagaaffiup politiivi aallaqqaasiutigalugu atortorissaarutit pitsaassusaannut atatillugu neqerooruteqarsinnaasussanit akineqarsinnaasussanik 13-inik apeqquteqaateqarput.
AAMMA ATUARUK Politiit radiukkut attaveqaqatigiissinnaanissaat qulakkeerniarneqartoq
Nunatsinni politiit, Naalakkersuisut, kommunit upalungaarsimasullu qatserisartut peqqinnissaqarfiillu politiit attaveqaqatigiittarfiannut ilanngunneqassanersut 2013-imili oqallisigisarpaat.
Tamannali qatserisartut peqqinnissaqarfiullu maanna naaggaarniarlugu aalajangeraat, Kalaallit Nunaanni Politiit KNR-imut ilisimatitsipput.
Taamaammat attaveqaqatigiittarfiup nutaap politiinuinnaq naleqqussakkap 2020-p naajartornerani atorneqalernissaa naatsorsuutigineqarpoq.