Radiokkut aallakaatitsinerup kipisoornera KNR-ip ajuusaarutigaa
KNR-ip ajunaarnersuaqartillugu sillimasussaatitaanera eqqarsaatigalugu, innaallagissatigut qamittoornermi aallakaatitsisinnaannginneq ilungersunartuusoq, KNR-ip pisortaata, Jacob Abelsenip oqaatigaa.
- KNR-ip radioani innaallagissatigut qamittoornermi generatoreqartussaagaluarpoq, taamaattoqannginneralu ajuusaarnarpoq, siunissamilu tamanna allanngortinneqartariaqarluni, KNR-ip pisortaa Jacob Abelsen oqarpoq.
Nuummi illoqarfiup ilaata innaallagissamik qamittoornera pivoq ullaaq nalunaaqutaq arfineq pingasut qaangilaara. Qamittoornermilu KNR-ip innaallagissamik qamittoortoqartillugu sillimmataa ikittussaagaluartoq, teknikkikkut pissuteqartumik aallanngitsoortoq, KNR-ip pisortaata oqaatigaa.
- Qulliit qamittoornerisa kingorna teknikkikkut atortorissaarut UPS ikinngitsoorpoq, tassalu tamanna pissutigalugu aallakaatitsineq uninngaannartariaqalerluni.
UPS-eqannginneq pissutaasoq
Jacob Abelsenip taasaa UPS tassaavoq innaallagissamik qamittoornermi batterii nammineq ikittartoq, tassalu taanna ikinngitsoorpoq aallakaatitsinerillu uninngaannartariaqalerlutik.
KNR-ip radioata immikkoortortaqarfia illu TV-qarfimmut atanngilaq. TV-qarfimmili generatoreqartoq radiop illorsuani soqanngilaq. Tamannalu allanngortinneqassasoq, KNR-ip pisortaa, Jacob Abelsen oqarpoq.
- Innaallagissatigut qamittoortoqartillugu generatori TV-qarfimmiippoq, tassalu tamanna allanngortinneqassaaq siunissami radio aamma generatorilerlugu, KNR-ip pisortaa, Jacob Abelsen oqarpoq.
Nukissiorfiit naapertorlugit assaasoqarnerani kabelimik ajoqusiisoqarsimanera innaallagissamik qamittoornermut pissutaavoq.