KNR Radio ullaarnganiit unnuup tungaanut

Ukiuunerani aallakaatitsiffik nutaaq ullumi aallartittoq aallarnerfigalugu radio ullaarnganiit unnuup tungaanut aallakaatitassianik nutaarluinnarnik tusagassaqartitsisalissaaq. Ulluinnarni ullaakkut arfineq-marluniit unnukkut arferngup tungaanut aallakaatitassiat nutaarluinnaat soqutiginartut, tutsuiginartut, alutornartut, quianartut, aliikkutassiaanerusullu aallakaatinneqartassapput.

Aallakaatitassiat uummaarissut, soqutiginartut pisunullu malinnaalluarfiusut anguniarlugit radiomiut sullipput, taamaammat tusarnaartartunut anngunnissaat qilanaaraarput, radiomi pisortaq Masaana Egede oqarpoq. 

Nunatta Nipaata aallakaatitassiortuisa pisarnertik malillugu qiimasumik ulloq aallarnertassavaat, kingornalu Junior Wowowip meeqqat silarsuaannut appakaatittassavaatigut. Ullaap tungaalu naggaserlugu kulturi inuillu pillugit aallakaatitassiaq Puilasoq pisarnermit akunnermik ataatsimik sivisunerusumik  aallakaatitsisassaaq, ilaatigut oqaasilerinermik, upperisalerinermik, timersornermik, ilinniartitaanermik, pinngortitalerinermillu imaqartassalluni.

Ullo’qeqqata kingorna nipilersukkat nuannarisat Appilaarummut sms-erlutit kissaatigineqarsinnaapput. Ualikkut sineriammit tusagassat lokalradionit assigiinngitsunit aamma tusarliunneqartassapput aammali aallakaatitassiaq nutaaq kalaallit Danmarkimiittut inuunerannik sammisaqarfiusoq Avalannerit Jan Berthelsenimit aaqqissuunneqartoq aallakaatinneqartassaaq. 

Inuusuttunut nalorninarsinnaasut, quianarsinnaasut inuillu soqutiginartut inuusuttorsiummi Senior WOWOWimi ullut tamaasa samminneqartassapput.

Inuiaqatigiinni oqallisaasut politikkikkullu pisut tusarnaartartut peqatigalugit Inuiaat Tillernerani sammineqartassapput, aallakaatitassiaq taanna aamma akunnermik ataatsimik sivisunerulissaaq sisamaniit arferngup tungaanut aallakaatinneqartassalluni.

Aallakaatittagassat allat

Unnukkut sapaatillu akunnerisa naanerini aallakaatittakkat qilanaarineqarsinnaasut ilamininngui tassaapput Stina Skiftep aallakaatitassiaa nuannarineqarluartoq Avalaappakkit, erinniarsuit Per Rosingimit ilisaritinneqartartut kiisalu Apollo Jeremiassenip arfininngornikkut ingerlattagaa Nunarput Nalunngiliuk, upernaaq manna aamma eqqugassarissaartussaq.

  • Ukiuunerani aallakaatitsiffiup nutaap, uummaarissumik aallakaatitsiviusussap tusarnaartartumut anngunnissaat qilanaaraaput. Aallakaatitassiat uummaarinnerusut anguniakkatsinnut tulluupput, kiffartuussinissamillu isumaqatigiissutitsinnut pitsaanerpaamik naammassinnikkusunnitsinnik ersersitsillutik, KNR-ip pisortaa Karl-Henrik Simonsen oqarpoq.

Aallakaatitsinissamut pilersaarut tamaat ugguuna takusinnaavat http://knr.gl/kl/radio/oversigt

 

Apeqqutissaqaruit KNR Radiop pisortaa Masaana Egede imaluunniit KNR-ip pisortaa Karl-Henrik Simonsen saaffigisinnaavatit email una atorlugu: info@knr.gl imaluunniit uunga sianerlutit +299 36 15 00.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!