Siunnersortit inimut akiliinissamut ikiorsiissasut
Aningaasaqarnermut siunnersortit marluk atorfinitsinneqareerput, akeqanngitsumik nipangersimasussaatitaallutillu kinaassutsimik nalunaarsuinertaqanngitsumik Kujataa tamakkerlugu siunnersuisartussanngussallutik. Siunnersuisartussat taakku Narsami Qaqortumilu ulluinnarni sulisartussatut pilersaarutigineqarput.
Inissianik attartortut akiliutissaminnik ajornartorsiuleraangata, soorlu ulluinnarni aningaasaqarnikkut allanngoriataartoqartillugu imaluunniit akilersugassatut pisussaaffigisat piffissaq eqqorlugu akilersornissaat ajornartorsiutaalertillugit.
Aningaasatigut siunnersortit siunnersuillutillu ilitsersuisinnaasassapput, soorluttaaq aningaasaqarnikkut atukkat, akiitsut akiligassallu tamakkiisumik aqussinnaalernissaannut ilitsersuisinnaasassallutik.
Kommuni, Namminersorlutik Oqartussat, aningaaseriviillu suleqatigalugit atorluagassatut periarfissaasut tamaasa atorneqarnissaat qulakkeertartussaagaat, INI A/S-ip tusagassiuutinut nalunaarutaani atuarneqarsinnaavoq.
Attartortoq peqatigalugu aningaasaqarnermut siunnersortit missingersuusioqataasassapput, pisariaqarfiutillugulu pisortaqarfiit akiligassaqarfiillu attavigisinnaasassallugit.
Attartortut inigisaminniit anisitaanissaraluisa pinngitsoortinnissaat, ikilisinnissaalluunniit anguniarlugu taama aaqqissuussineq misileraaneruvoq, annertuumillu akiitsoqalertartut inuuniarnermikkut aaqqikkuminaatsumik inissisimalernissaraluat pinaveersaartinneqassalluni.
Aningaasaqarnermut siunnersortit attartortunut ikiuiumallutik saaffiginnittartussaapput, attartortulluunniit aningaasaqarnermut siunnersortinut saaffiginnissinnaallutik. Taamaaliorniaraanni ikorfaq@ini.gl-imut saaffiginnittoqarsinnaassaaq, soorlu aamma oqarasuaat 70 10 00 aqqutigalugu saaffiginnittoqarsinnaassasoq.
