Qaasuitsup Kommunia: Qulaajaaqqaarnissaq pisariaqarpoq
Nuugaatsiarmiut Uummannamut qimagutitinneqarmata ullut tallimat qaangiupput. Nunaqarfigisaminnulli qaqugu utersinnaanissaat suli oqaatigineqarsinnaanngilaq:
- Pissutigalugu apeqqutaagami Nuugaatsiaq qanoq sukkatigisumik napparteqqissinnaanersoq, Qaasuitsup Kommuniani Kultureqarnermut, Atuartitaanermut Sunngiffimmilu Ingerlatsivimmi pisortaq, Sivso Dorph oqarpoq.
AAMMA ATUARUK Uummannaq ikiuiniarluni sukkanerpaamik iliuuseqartoq
Qulaajaaqqaarnissarmi pisariaqartoq, Dorphip oqaatigaa:
- Tamannarpiarlu massakkut misissorneqarpoq: Qanoq amerlatigisut uteqqikkusussappat, allanut nuukkusussappat taamaassimassappallu sumut nuukkusussappat?
Nuugaatsiarmiut Uummannamut nuukkusunngitsut illoqarfinnit allanit aamma tikilluaqquneqarput:
- Soorlu Ilulissat, Qeqertarsuaq Qasigiannguillu tigusinissaminnik piareeqqapput.
Nuugaatsiarli uterfigineqassappat atuarfik, peqqinnissaqarfik, pisiniarfik illullu aaqqissuunneqaqqaassasut, Dorphip erseqqissaatigaa:
AAMMA ATUARUK Qutsavissaapput Aasiammiut
- Taakkua tamarmik atuleqqissinnaanissaannut piffissaq sivisungaatsiartoq atorneqarsinnaasoq naatsorsuutigineqartariaqarpoq, taannali oqaatigiuminaattorujussuuvoq.
Illorsuarneersut Niaqornaneersullu, Aasiannut Uummannamullu aamma qimagutitinneqarsimasut, nunaqarfigisaminnut suli utersinnaanngikkallarput. Nunaqarfiilli navianartorsiorunnaarpata angerlaqqissinnaalissapput.
- Taakkunani nunaqarfinni marlunni illunik imatut ajoqusertoqarnikuunngilaq. Taava (nunaqarfimmiut, aaqq.) taakkununnga nunaqarfinnut marlunnut qaqugu uterusussanersut apeqqutaaginnalerpoq, Qaasuitsup Kommuniani Kultureqarnermut, Atuartitaanermut Sunngiffimmilu Ingerlatsivimmi pisortaq, Sivso Dorph oqarpoq.
Innuttaasut qaqugu uternissaat Namminersorlutik Oqartussat aalajangissavaat.