Qujaukitsup Siumumit ilaasortaajunnaarnera paasineqarsinnaasoq

- Tassami paasisinnaavara, maannakkut isumaqatigiinnginneq, pingaartumik aamma akerleriinneq, inuttut aamma ilaatigut annernartunik ilaqarsimasoq. Ilaqarsimanera pissutigalugu paasisinnaavara, Lars-Emil Johansen oqarpoq.

Aamma Jens Immanuelsenip paasisinnaavaa.

- Nammineq aalajangernera soorunami ataqqisariaqarpoq.

- Paasisinnaaviuk?

- Aap, Jens Immanuelsen taama oqarpoq.

Taamali oqarnini annerusumik itisilerusunngilaa.

- Inuttaata nammineerluni nassuiarumaarpaa. Tusagassiorfitsigut annertuumik sammineqarnikuupput, Jens Immanuelsen oqarpoq.

Lars-Emil Johansenilu Qujaukitsup ilaasortaajunnaarneranut paasinnissinnaagaluarluni ajuusaarpoq.

- Ajuusaarnarpoq. Soorunami parteeqatit qimagukkaangamik ajuusaarnartuaannarpoq, Lars-Emil Johansen oqarpoq.

Taanna folketingimi ilaasortaanermini Vittus Qujaukitsup Siumup folketingimi allaffeqarfiani sulinerani naalakkersuisuuneranilu suleqatigilluartarsimallugu, Lars-Emil Johansenip oqaatigaa.

- Inuk suliaminut tunniusimasoq, peqqissaaqqissaartoq. Taamaattumik maqaasinassaaq, Lars-Emil Johansen oqarpoq.

KNR Siumumeersunik allanik aamma oqaloqatigisaqarpoq, Vittus Qujaukitsulli partiimit aninera oqaaseqarfigineqarusuppallaanngilaq.

Kinaluunniit qanoq iliornissaminik kiffaanngissuseqartoq, Jess Svane oqarpoq, Vivian Motzfeldtillu Qujaukitsup aalajangernera ataqqillugu tusaatissatullu tiguinnartariaqarlugu oqaatigaa.

Vittus Qujaukitsullu Siumumit ilaasortaajunnaarnera partiip tusaatissatut tigugaa, Siumup siulittaasuata, Kim Kielsenip taamaallaat oqaatigerusuppaa.

- Siumuminngaanniit tusaatissatut tiguarput, Kim Kielsen oqarpoq.