Qujaukitsoq Siumumit anisoq

Vittus Qujaukitsoq Siumumi ukiut 28-it ilaasortaareerluni partiimit tunuarnini KNR-mut nalunaarutigaa.
Assi © : KNR
Allattoq Mads Pedersen
septembarip 28-at 2017 06:00

Vittus Qujaukitsoq siulittaasumut, Kim Kielsenimut, Siumup juunimi ataatsimeersuarnerani unammillerami ajorsarpoq.   

Qujaukitsup Siumumi siulittaasussatut sassarnermini Nunatta naalagaaffinngornissaata ullulerneqarnissaa pingaarnertut qineqqusaarutigaa. Illuatungaanilu Kim Kielsenip Siumut naalagaaffinngornissamut sulinera ullulernagu ingerlanissaa qineqqusaarutiginikuullugu. 

Tamannalu Vittus Qujaukitsup akuersaarsinnaanagu Siumumit tunuarpoq. 

- Partiip nunattalu killiffia akuerisinnaanagu tunuarpunga. Nunatta namminiilivinnissaa nukinginnartoq Siumumiit pimoorunneqanngilaq, aammalu oqartussaanerulerniarluni suliniutit kinguarsarneqarput, Qujaukitsoq KNR-imut oqarpoq. 

Siunissami sussanersoq aperineqarami oqarpoq, namminiilivinnissaq pillugu sulineq qitiutillugu politikkikkut sulinini nanginniarlugu. Partiiliussanersorlu  aperineqarami ima akivoq:

- Periarfissaq taanna mattutinngilara.

Vittus Qujaukitsoq Inatsisartunut 2018-imi sassartitsisinnaasumik partiiliussagaluaruni innuttaasunit ikinnerpaamik 942-t taperserneqartariaqarpoq. Tassa kingullermik qinersisoqarmat qinersisut 31-rarterutaat atsiortariaqarput. Namminersorlutik Oqartussat KNR-imut taama ilisimatitsipput. 

Kim Kielsenip naalakkersuisoqatigiivini ilaasortaagallarami Qujaukitsoq oqallisaasarnikooqaaq. Qujaukitsoq nunanut allanut tunngasunut naalakkersuisuunermini Naalakkersuisut ilisimateqqaarnagit Qallunaat Nunaat pillugu FN-imut maalaaruteqarnikuuvoq, kinguneranillu Kim Kielsenimit soraarsinneqarnikuulluni.