Quiasaarineq aamma naqisimaneqanngitsumik oqalussinnaatitaaneruvoq

Labrador' Kangian' saqqummiisartut quiasaarusiorsimapput aappariit siunnersortittarnerat pillugu. Quiasaarummi ilaatigut eqqaaneqarput NÛK-mi arsaattartut tassani arnaqatigiita atoqatigiittarnerat eqqaaneqarluni.

NÛKp sungiusaasua John Thorsen piumasaqarpoq aallakaatitassiamit tassannga utoqqatsertoqassasoq. Taassuma aarleqqutigaa taamatut quiasaarineq pitsaanngitsumik kinguneqarsinnaasoq.

Kisianni utoqqatsernissamut pissutissaqanngitsoq eqqumiitsuliortut kattuffissuat Eqqumiitsuliornikkut Pinngorartitsisut Ingerlatsisullu EPI isumaqarpoq.

- Eqqumiitsuliortortavut pinngorartitsileraangata suulluunniit tikinneqarsinnaasariaqarput, inuiaqatigiit tarrarsorfigissammatigit, tassanilu apeqqutaanngilaq politikkeriuneq, inuussutissarsiortuuneq, timersortartuuneq imaluunniit inuiaqatigiinni arlaanni inissisimaneq, EPI-mi allaffimmi pisortaq Manasse Berthelsen taama nalunaarpoq.

- EPI isumaqartuaannarpoq nutaaliorsinnaaneq KNRimi takussaaleqqittariaqartoq uanilu pineqartumi KNRip qangali amigaatigisaaa pissarsiarineqarpoq isiginnaartitsinikkut piginnaasaqarluartut takkummata. Minnerunngitsumik taama ittut KNRimi pisariaqartippavut tamatigoortuuneq pitsaasumillu aliikkusersuisinnaaneq qulakkeerniarlugu, Manasse Berthelsen oqarpoq.

Taamaattoq NÛK arsaannermi arnartai quiasaarummit ajuallatsinneqartutut misigisimapput.

- Tatiginarnermik innarliiniarneq assut ajuallannarpoq illua tungeriissitsiniarlunilu, allaat kingunerisinnaallugu ilaasortatta ilaasortaajunnaarnerat, imaluunniit ilaasortanngorusukkaluit taamaatiinnarnerat, NÛKp sungiusaasua John Thorsen oqarpoq.

Labrador' Kangian' juulli sioqqullugu aqagu kingulliugallartumik aallakaatinneqassaaq. Tamanna pissaaq DRip Nunatsinnut juullimut inuulluaqqusinera aallakaateqqinneqareerpat. Labrador' Kangian' aallartissaaq nalunaaqutaq 22.45 aallakaatitarlu oqallisaaqisoq aqagu nalunaaqutaq 15.05 aallakaateqqinneqassaaq.

Labrador' Kangian' aallakaatitat uani takoqqissinnaavatit: http://knr.gl/labrador