Qoorortuumik umertissimasoq suliassanngortitsivoq

Tûgdlimmi najugaqarsimasoq 17-inik ukiulik ima oqaluttuarpoq:

- Anaanaga meerartaarnikoq aneqqusaanngilanga, taamaalillunga qiasunngunermik angallammik Qooqquniit aallarussivugut. Aallareerluta tunumut qiviaratta, angallat tungiinnatsinnut ingerlasoq takuarput. Angallat taanna kigaallanngiivilluni apoqattaariarluta qunusaarpaatigut, aallaammillu umerluta.

Suliamut tunngassutilinnik pappilissanik paasiniaannitsinni paasivarput, Tûgdlik Namminersornerullutik Oqartussanut nalunaarusioraangami allattarsimagaa, nukappiaqqat periarfissaqartinneqarluartartut ilaquttaminnut pulaarsinnaannissaminnut. Kisiannili apersukkatta, qatanngutitaava takoqquneqarsimanngilaq taamaalillunilu angallammik aallarussisimagaluarluni.

Apersugarput, taamani 15-inik ukioqartoq, angallammik qimaagaluarnermi kingorna pillagaasimavoq issiavimmi sapaatip akunnera issiatitaalluni aatsaat nerileraangami innaleraangamilu nikissinnaatitaalluni.

Qoorortuumik umertissimanini inunnut arlaanut oqaatigisimanerpaa?

- Ataatannut ingerlaannaq oqarpunga, politeeqarfiliaqqullugu. Politiit Tûgdlimmut sianersimagamik, paasisaallungalu unnerlussimallunga. Ingerlaannaq aallaammik tunivaanga, tiittorfillu eqqoriaqqullugu assut kamallutik. Tûgdlimmioqatima tamarmik isigaannga, uanga ersititaallunga assut. Tassa allanut unnerlussimagaangatta, assut pillagaasarpugut, 17-inik ukiulik oqarpoq.

Maannali inuusuttuaqqat Tûgdlimmi najugaqarallarnerminni persuttagaarsarsimanerminnut atatillugu unnerluussisimaneri aallaavigalugit, politiit suliaqarput. Tassa Tûgdlimmi najugaqarsimasut ilaat, sulisunit persuttartissimanermik kingorna, politiinut suliassanngortitsisimaneri maanna suliarineqaleruttorput.

Apersukkatta oqaluttuaraa, unatagaasarnini qatsulluinnarlugu, Namminersorlutik Oqartussanut naammagittaalliuutigisimallugit.

Tûgdlimmiit pisoq pillugu oqaaseqartitsiniaraluaratta Tûgdliup inatsisilerituanit Finn Meinelimit allaffigineqarpugut, pisut ataasiakkaat pillugit oqaaseqarsinnaannatik.