Qipoqqarnat tipisut amerlanerulernerat Canadami ernumanartoqartikkaat

Qipoqqarnat toqungasut qulit Canadap kangimut sineriaani St. Lawrencep kangerluani qaammat kingulleq nassaarineqarput.

Arfernillu toqungasunik nassaartoqarnera aalisartut, ilisimatuut aalisarnermullu ministereqarfiup ernumanartoqartippaat, qipoqqarnat nungutaanissamut ulorianartorsiormata. Sinneruttut 500-t missaannaaniinnissaat naatsorsuutigineqarpoq, aamma ukiumut pingasuinnarnik piaqqisoqartarnera ilimagineqarpoq.

Aalisarnermut ministerip Dominic LeBlancip tusagassiorfinnut oqaatigaa Canadap nunatut aalisartoqarfittut akisussaassusilittut isigineqarneranut innarliisinnaanera ernumagineqartoq. Canadami arfernik illersuisinnaanngitsutut isigineqalissagaluarpat pingaartumik USA-p Canadap Amerikami niuerfinni tuniniaaneranik killiliisinnaanera ernumassutigineqarpoq.

Qipoqqarnat planktoninik - uumasuaqqanik immap ikerinnaaniittunik - sinerissap qanittuanut ukioq manna neriniartalersimanerat paasineqarsimavoq, sinerissamullu qanillattornerminni qassutit umiarsuillu ajornartorsiutigisarpaat.

Aalisarnermut ministeqarfiup sumiiffimmi qassutit atorneqartut ikilisinniarlugit ukioq manna saattuarniarneq unitsereersimavaa. Ministereqarfiup aamma assartuussinermut ministereqarfik suleqatigalugu umiarsuit ingerlaarfigisartagaat allanngortinneqarsinnaanersut misissorniarpaa, arferit arlallit umiarsuarnit aporneqarlutik toqusimanissaat ilimagineqarmat.