Canada: Qipoqqarnat illersorneqarnissaannut pilersaarut nammassileraat

Skt. Lawrencep kangerluani atlantikullu avannaata ilaani qipoqqarnat periarfissaqarallartillugu illersorneqarnissaat pillugu pilersaarut Canadami aalisarnermut ministereqarfiup suliaralugu naammassilerpaa.

Canadamiut aalisarnermut ministeriata LeBlancip qipoqqarnat sinnerittut 450-it missaanniittut sapinngisamik pitsaanerpaamik illersorneqarnissaat pillugu ilisimatuunik, nunap inoqqaavinik, aalisartunik umiarsuaatileqatigiiffinnillu ataatsimeeqateqarpoq.
 
Arferit qanillattornerini meterinik 100-nik ungasitsigisarnissaat ilaatigut siunnersuutigineqarpoq, arferit arlallit umiarsuarnit aporneqarlutik toqusarmata.

AAMMA ATUARUK Qipoqqarnat tipisut amerlanerulernerat Canadami ernumanartoqartikkaat

Aaqqiissutissaq alla tassaavoq saattuarniarnermut piffissaliussat allanngortinneqarnissaat, arferit ingerlaarnerini aalisarneq pisarunnaartillugu.

Umiarsuit takornariartaatit, pujortuleeqqat kilisaatillu arferit qanillattornaveersaaginnarnagit aamma kigaannerusumik ingerlasalissapput.
 
Umiarsuaatileqatigiiffiilli tamanna iluarinngilaat aningaasarpassuarnik annaasaqaatiginissaa aarleqqutigigamikku, tamatumunngali peqatigitillugu umiarsuit takornariartaatit tungaannit oqaatigineqarpoq arferit annaanniartariaqartut, taakkuummata takornariat takorusutaat.
 
Qipoqqarnat katillugit 16-it toqungasut siorna aasakkut siumorneqarput,  illersorneqarnissaannullu aaqqiissutissamik pitsaasumik nassaartoqanngippat, qipoqqarnat ukiut 20-t missaat qaangiuppata nungutaanissaat Canadami aarleqqutigineqarpoq.