Qinnuteqaatit pissusissamisut suliarineqarput

- Efterskolernissamut qinnuteqarnerit pissusissamisoortumik ingerlanneqarput, ajornartorsiortoqanngilaq, taama Ilinniartitaanermut Pisortaqarfimmi atorfilik Franz Tremel, Sisimiuni Oqaatsinik Pikorissarfimmi siunnersortip Lars K. S. Olsen-ip qinnuteqaatinik amigarneraaneranut oqaaseqarpoq.

Lars K. S. Olsen arfininngormat radioaviisimut oqarpoq nunatsinni inuusuttuaqqat Danmarkimi efterskolerniarlutik qinnuteqaataasa ilarpassui, Oqaatsinik Pikkorissarfimmut nassiunneqarsimasut naammassillugit suliarineqarsimanngitsut.

Lars K. S. Olsen-ip erseqqissaatigaa Ilinniartitaanermut Pisortaqarfik pisussaasoq, Efterskolertitsisarnermut peqqussut nutaaq atuarfeqarfinnut tamanut naammaginartumik paasissutissiissutigissallugu.

- Karateerit atuarfiullu oqaaseqaatai qinnuteqaatit ilaannut ilanngunneqanngitsoorsimapput, tamakkualu Oqaatsinik Pikkorssarfimmut maanna nassiussuunneqaleruttorput, Franz Tremel, nassuiaavoq.

Franz Tremelip aamma erseqqissaatigaa qinnuteqaatit kommuninit tamaneersut nassiunneqareersimasut, inuusuttuaqqallu katillugit 291 qinnuteqarsimasut.