Qinigassanngortittut aqqi piareerput

Kommunerujussuanngortitsinermut atatillugu ikaarsaariarnermut ataatsimiititaliassanut qinersinissamut qinigassanngortittut aqqi piareerput.
marsip 27-at 2008 10:50

Katillugit 332-t qinigassanngortipput, taakkunannga Siumukkormiut amerlanersaapput tulliullutik Inuit Ataqatigiit sassartitaat.

Avannaata kommunerujussuassaani kommunalbestyrelsessamut sassartut amerlanersaapput taavani 118-t sassarmata. Kitaata kangiatalu qinersivianut sassartut katillugit 116-iupput.

Kalaallit Nunaanni pissutsisut allattoqarfimmi atorfillit ullut kingulliit ulappupput qinigassanngortittut nalunaarsorniarlugit, qinigassanngortittut aqqisa eqqortumik allassimanissaat pisariaqarmat.

-Qinigassanngortittut ataasiakkaarlugit oqaloqatigaagut, inuillu allattorsimaffii tamaasa paasissutissanik piniarfigalugit, Leif Scharling, qinigassanngorittut aqqisa paasiniaqqissaarneranni ataqatigiissaarisoq oqarpoq.

Peqataanik aamma qinersinermi paasissutissanik katersinissamut atatillugu attaviit, atortorissaarutit aqqutissallu misilerarneqarput, ullup qinersiviup unnukkuani suna tamarmik piareersimaniassammat.

– Qarasaasiatigut ajornartorsiuteqallattaaginnavittarpugut aamma sulisut suleriaasissatik sungiusaqqaartarpaat, misileereerluta paasivarput suut tamarmik pissusissamissut ittut, Leif Scharling oqarpoq nangipporlu:

- Taasinerilli nalunaarutigiortorneqalerpata kinguussaalaartarsinnaanissarput naatsorsuutigisariaqarparput, nunaqarfiit illoqarfiilluunniit arlaanni ajutuuallattoqarpat kommunerujussuarni taasinerit inernerat tamakkiisoq kalluarneqartussaammat, taamaakkaluartoq Leif Scharling isumalluarpoq aammalu suut tamarmik iluatsinnissaat qularinagu.