Qinigassanngortittoq: Ilinniarsimanermut allagartat misissorneqartalerlik
- Nalunngilarput Michael Binzer uukapaatitsilluni ilinniarsimanerminut tunngatillugu eqqunngitsnik tunniussisimasoq, tamannalu inuttaata nammineq nassuerutigaa.
Lars Jørgen Kleistip aamma oqaatigaa ilimagalugu, Nunatsinni qaffasissumik atorfillit arlallit Michael Binzeritut iliorsimasinnaasut, taamaattumillu siunnersuutigalugu atorfillit misissuiffigineqartarlernissaat.
AAMMA ATUARUK Michael Binzerip CV-minik kusassaasimanini utoqqatsissutigigaa
- Suliffeqarfissuit Namminersorlutik Oqartussat pigisaanni aamma pisortani atorfillit misissuiffigineqarsinnaasariaqaraluarput. Taama misissuinermi atorneqarluarsinnaavoq Tranparency International Greenland, Lars Jørgen Kleist oqarpoq.
Nunatsinnili peqquserlunnerit akiorneqarnissaannik suliniaqatigiiffimmit, Tranparency International Greenlandimit aningaasassaqannginneq pissutigalugu, atorfillit ilinniagaqarnerminnut uppernarsaataannik misissuisarnissaq pisinnaassanngitsoq, suliniaqatigiiffimmi siulittaasup Anita Hofferip, aviisimut Sermitsiamut ippassaq oqaatigaa.
Taamaattumik Lars Jørgen Kleistip siunnersuutigaa, Tranparency International Greenland oqartussanit aningaasalersorneqarluni misissuisinneqartalissasoq.
Suliniaqatigiiffiup aningaasalersorneqarsinnaanini iluaqutaasinnaasoraa
Anita Hofferip KNR-imut oqaatigaa, pingaaruteqarmat Tranparency International Greenlandip arlaannaannulluunniit attuumassuteqannginnissaa. Taamaattorli oqartussanit aningaasalersorneqarsinnaaneq iluaqutaassaqisoq oqaatigalugu, Anita Hoffer taama oqareerluni ima nangippoq.
- Aningaasalersorneqaleraluaruttaluunniit Tranparency International Greenlandimit pingaartipparput suliniaqatigiiffitta aalajangersimasunit suliakkerneqartannginnissaa, tassami uagut nammineerluta suna suliarissanerlutigu aalajangiisarnissaq pingaartipparput, Anita Hoffer KNR-imut oqarpoq.
Nangillunilu oqaatigalugu oqartussat kommunillu suliffeqarfiini atorfinitsitsisarnerit aamma siulersuisunik toqqaasarnerit, Tranparency International Greenlandimit suliarineqartarneri ingerlaannassasut.
Tamannalu Lars Jørgen Kleistip nuannaarutigaa.
- Tamakku suliassat pingaaruteqarmata nuannaarutigaara taamaaliortarnissaat tassami pingaaruteqarpoq tamakku aamma qaammarsaassutigineqarnissaat, Siumut sinnerlugu Inatsisartunut qiningassanngortittoq, Lars Jørgen Kleist taama oqarpoq.