Qinigaasut suleqatissarsiussapput
Periarfissat marluk politikkikkut naliliisartup Lars Hovbakke Sørensenip tikkuapai. Tassalu Lars-Emil Johansenitulli Christiansborgimi politikikkut suleqatigiinnut angisuunut ilaasortanngorneq, aamma periarfissat aapparalugu, politikikkut suleqatigiinnut mikinerusunut soorlu Atlantikup avannaani suleqatigiinnut ilaasortanngortoqarsinnaanera soorlu Juliane Henningsen taamaaliortoq.
Tassalu periarfissat taakkua kalaallit folketingemut qinigaasussat suliassaat, Lars Hovbakke Sørensen, Københavnip Universitetani lektori, politikikkullu naliliisartoq KNR-imut oqarpoq.
Kalaallit Nunaani partiit folketingemut qinigaatitaqarsimasut Christiansborgimi suleqatigisagaat allanngorartarput.
Folketingemut qinigaanerup kingorna, Christiansborgemi suleqatigiinnut sorlernut ilannguttarneq aalajangiisusarpoq, tassalu danskit partiianni suleqatigiinnut ilanngunneq apeqqutaasarluni, imaluunniit suleqatigiinnut ilanngunnani kiffaanngisuseqarluni sulinissaq toqqarneqarsinnaalluni. Suleqatigiinnummi ilanngunnani sunniuteqartoqarsinnaavoq, tassani apeqqutaalluni sulineq qanoq ingerlanneqarnersoq ulluinnarnilu sulinerit iluatsinnersut apeqqutaallutik, Lars Hovbakke Sørensen oqarpoq.
Christiansborgimi partiit suleqatigiiffiinut angisuunut soorlu Socialdemokraatinut Venstrenullu ilaasortaaneq immaqa ajornannginneruvoq, kisianni aamma kalaaliuneq aammalu Kalaallit Nunaanneersuuneq ajornannginnerusumik saqqummiunneqarsinnaavoq partiit avataaniittunut suleqatigiinnut kiffaanngissuseqarnerulluni ilanngukkaanni soorlu Atlantikup avannaani suleqatigiittut ittunut ilanngukkaani, Lars Hovbakke Sørensen Københavnip Universitetiani lektori, politikikkullu naliliisartoq KNR-imut oqarpoq.