Qinersisartut: Aaqqissuusseqqinneq annertooq qanoq sunniuteqassava
Kommunimut maanna akileraarutivut taamaaginnassanerpat, maannami aningaasat naleerukkiartorneranni inuuvugut, naak aningaasat naleerukkiartornerisa nassatarigaluaraat ulluinnarni pisiarisartakkatta procentinik tallimanik akitsornerat, aamma illumut imermullu akiliutit qaffannerat.
Meeqqatta atuarfii pitsanngornerussappat?
Ilinniarsimanissamik anguniakkat qanoq pissappat?
Peqqinnissaqarfik maannakkutut iinnassava? - nappaaterpassuimmi inuunitsinni pissutsinut apeqqutaaqisut nutaat maanna atugaalersimapput.
Akissarsiat apeqqutaatinnagit ilaqutariit tamarmik atugarissaarnerulernissaannik neriorsuutaajuartut kommunit nutaat piviusunngortinniassanerpaat?
-Ilumut! Qinersineq sioqqutitsiarlugu malunnarpoq, aaqqissuusseqqinnerup uuma uatsinnut ilaquttatsinnullu siunissami qaninnermi qanoq kinguneqarnissaa innuttaasut assut eqqarsaatigilersimagaat. Taama oqarpoq qinersinissaq pillugu KNR-ip naliliisittagaa, Sten Lund, qinersisartunik ippassaq ataatsimiititsisoqareersorlu.
Qineqqusaartut aamma – taakku qinigaasussat – kommunit aqqissuuteqqinnissaannut akisussaalersussat – ilaqutariinnermut tunngassuteqartut eqqarsaatiginerulersimagaat qinersinngilaarnitsinni malunnarsivoq.
Kangiani-Kitaanilu kommuninngortussami Siumut sinnerlugu qinigassanngortittoq Kim Godtfredsen taamaalilluni allappoq, ilaqutariinngornissaq peqqissumillu ilaqutariinnissaq ajornannginnerulersariaqartoq.
Meeqqeriviit akisoqisut, meeqqat mikinerit paaqqinnittarfinni inissaqartinneqanngitsut, perorsaasunik ilinniarsimasunik amigaateqarneq, paaqqinnittarfiillu pitsaasut pilersinneqartariaqarput, Kim Godtfredsen allappoq. Toqqaannartumillu maanna siunnersuutigaa, ilaqutariit meeqqallu pitsaanerusumik atugaqalernissaat siuarsarniarlugu iliuusissanik akuersissutinik piniarluni Siumut Nuuk-p Naalakkersuisut oqaloqatiginiarai.
IA-mut qinigassanngortittut ilaata, aamma Kangia-Kitaani, Ove Karl Berthelsenip, periuseq nutaaq atorlugu aningaasarsisitsoqartalernissaa allaat siunnersuutigaa.
Taanna oqarpoq, ilinniagaqarsimasut aningaasarsiaasa qanoq ilillutik qaffanneqarnissaat misissorneqartariaqartoq, pisortanit tapiiffigineqartarnissaq taamaalilluni pisariaqarunnaassammat. Innuttaasut imminnut tatiginerulernerannik tamanna kinguneqassaaq, Ove Karl Berthelsen oqarpoq.
Inuiaqatigiinni oqalliseqataalluartartoq, Siumumeersoq, Juaaka Lyberth, Sisimiuneersoq, allappoq, qineqqusaarnermi maqaasisani annerpaaq tassaasoq, kommunit kattuppata kommunini namminerni isertitassat pillugit assigiinngissutsinut naligiissarinissap partiinit oqallisigineqanngippallaarnera.
Allaanngilaq apeqqutit tamakku tikinnissaat tamarmik merserigaat. Partiili apeqqutinut taakkununnga isummersorsimassagaluarput, Juaaka Lyberth isumaqarpoq.
Qinersineq pillugu oqallinneq KNR-TV-kkut unnugu aamma aallakaatinneqassaaq.
Partiit siulittaasuisa kalaallisut oqallinnerat nalunaaqutaq arfineq-pingasunut qallunaatullu qulingiluat qaangerlugit tanneq pingasunut aallakaatinneqassapput.
