Qinersisartunik misissuineq: Inuit Ataqatigiit annerpaanngussapput

Inuit Ataqatigiit siuariarujussuarlutik qinersinerup kingorna annerpaanngussapput, qinersisut 44 procentiinit taaguunneqarlutik. Ilisimatusarfiup qinersisartunik misissuinera, inuit 451-it oqarasuaatikkut apersorneqarnerisigut suliarineqartumi, taama inerneqarpoq.
Allattoq Jens Thorin
maajip 28-at 2009 13:38

Qinersinermi naliliisartup Sten Lundip ilimagaa, inuusuttuunerusut misissuinermi peqataasimanerannut tamanna ersiutaasoq, aammali misissuinerup inernerisa tutsuiginassuiat apequserpai:

- Taamanna misissuiniaraanni oqartoqakkajuttarpoq inuit 1000 -1200 missaanni amerlassusillit apersorneqartassasut, taamaalilluni isumasiuineq ilumoornerusumik tunngavissaqassaaq, ilisimatuussutsimik periutsit atorlugit qinersisartunik misissuisimaneq pillugu Sten Lund Jens Thorinimut taama oqarpoq.

Pia Vedel Ankersen, Ilisimatusarfimmi allaffissorluni ingerlatsinermi ilinniartitsisoq, misissuinermi siuttuuvoq, misissuinerlu suli nunatsinni saqqummiunneqarani, kisianni danskit aviisiini Politikkenimi saqqummereerpoq. Politikkenilu naapertorlugu Siumup qinersisai 9 procentimik ikileriassapput, aammalu Atassut affaannanngussallutik, taamaattumik Ilisimatusarfiup misissuinera naapertorlugu taakku qinersinerup kingorna naalakkersuisunngortitsisinnaanngillat.

Qinersisartut inuusunnerusut ilinniarsimasullu misissuinermi peqataanerusimasinnaanissaat Sten Lundip ilimagaa.

- Taakkuugunarpullu qanoq qinersissallutik siusinnerusukkut inissiffissaaleqisarsimasut, taamaattumillu immaqa Demokraatinut qinersarsimagaluit maannakkut Inuit Ataqatigiinnut nuussimasinnaapput, oqariartuutiginiakkatik tassuuna annissuunneqartut takusinnaalersimavaat, Sten Lund oqarpoq.

>//<

- Tassa assigiinngitsut peqqutaaqataapput, uani ukiuni 30-ni ingerlanialuusaarsimaneq immaqa maannakkut Namminersulernissamut ikaarsaarnialernermi takorluukkat nutaat tusaaniarneqalersimasinnaapput, aammalu inuiaqatigiit aningaasaataannik atorneruisaqattaarnerit tamassumunnga pissutaaqataasinnaalluni, Sten Lund oqarpoq.