Politikki TV

Qinersisartunik ataatsimiititsinissat KNR-ip kinguartittariaqalerai

Silarlunnera timmisartuussinissanillu taamaatitsinerit pissutigalugit Qaqortumi qinersisartunik ataatsimiititsinerit marluk sapaatit-akunnerata naaneranut kinguartinneqarput.

Allattoq Kenneth Elkjær

marsip 21-at 2017 09:40

Nutserisoq Simon Uldum -

KNR-ip sulisui arlallit silarlunnera pissutigalugu Sisimiunit ingerlaqqissinnaannginnerat pissutigalugu Qaqortumi qinersisartunik ataatsimiititsineq ullumi marlunngornermi pisussaq kinguartinneqarpoq.

Aqagu pingasunngornermi oqallitsitsinissaq aamma kinguartinneqarpoq. Aaqqissuussinerit taakku marluk sapaatit-akunnerata naanerani ingerlanneqartussanngortinneqarput.

- Angalatitavut Sisimiuni saperngupput taamaattumillu piffissaq eqqorlugu apuussinnaanatik. Taamaammat qinersisartunik ataatsimiititsineq apeqqarissaarnerlu sapaatit-akunnerata naaneranut nuuppagut. Ataatsimiititsinerit ingerlanneqarnissaat Kujallermi qinersisartunut politikerinulu soorunami pingaaruteqarput, ingerlanneqarnissaallu sapinngisarput tamaat anguniassavarput, KNR-imi nutaarsiassaqartitsinermi pisortaq, Mikkel Bjarnø Lund, taama oqarpoq.

Sapaatit-akunnerata naanerani pisussat:

TV & Radio Arfininngorneq 25/3 nal. 14:00: Qinersisartunik ataatsimiititsineq, Qaqortumi Niuernermik Ilinniarfimmi.

Radio Sapaat 26/3 nal. 14:00: Tasiilami qinersisartunik ataatsimiititsineq apeqqarissaarnerlu.

TV & Radio Sapaat 26/3 nal. 19:30: Apeqqarissaarneq, Qaqortumi Niuernermik Ilinniarfimmi.