Qinersinissamut naliliisartoq:Inissaqarniarneq soqutigineqaqaaq

Kalaallit Nunatsinni kommunini sisamani nutaani kikkut aqutsisuullutillu sinniisuussanersut marlunngorpat apriilip ulluisa arfineq-pingajuanni qinersiartunnginnitsinni ullumi qineqqusaartoqarpoq, aqagu aamma taama pisoqassalluni. Qinersinissaq pillugu Nuummi ataatsimiinneq KNR-Radiokkut TV-kkullu kalaallisut qallunaatullu toqqaannartumik ullumi aallakaatinneqarpoq. KNR-ip naliliisittagaasa pingasuusut ilaat, Sten Lund, ualigaa aperaarput, qinersinissaq pillugu ataatsimiinnermi suna maluginiarnerusimaneraa:
apriilip 05-at 2008 17:06

-Maluginiakkama ilagaat inissaqarniarneq meeqqallu aallunneqarnerunissaat qinersisartut apeqqutigisaqattaaraat. Malunnarpoq maani Nuummi inissaqarniarnerup qanoq iliorfigineqarnissaa annertoorujussuarmik qinersisartuninngaaniit ujartuiffigineqartoq. Eqqarsaqqajaanarsivoq ”nunama qanoq ikiorsinnaavaanga”-mik eqqarsarneq atuuttorujussuusoq, immaqa muminneqarsinnaagaluarluni ”nunannut uanga qanoq iliorsinnaavunga”-mut, Sten Lund oqarpoq, nangillunilu:

-Angajoqqaat tamakkuninnga nalaataqarsimasut, inissaaleqinermik nalaataqarsimasut, ulluinnarni atugarisamik pitsanngorsarneqarnissaat pingaartikkat malunnarpoq.

Sten Lund naggataagut oqarpoq, qinersisoqaraluttualernera qinersisartut akornanni malunnartoq, eqqaallattaarneqalerpoq kikkut sunik eqqartuinersut, tassa innuttaasut pissangajartorput.

Partiit kalaallisut apeqqarissaarfigineqarnerat kingulleq aqagu sapaammi unnukkut nalunaaqutaq arfineq-pingasunut KNR-TV-kkut toqqaannartumik aallakaatinneqassaaq, qallunaatut qulingiluat qaangerlugu tanneq pingasut aallakaatinneqarumaarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq