Qinersinerup inernera danskit politikeriinit qiimmattaatigineqarpoq
Inunnik isumaginninnerup iluarsaanneqarsinnaalernissaa minnerungitsumik isumalluarfigineqarpoq.
Per Ørum Jørgensen oqarpoq, nammineq isumalluarluni, qinersinermilu ajugaasut tassaasut kalaallit meerartaat.
Line Barfodip, Enhedslistenimeersup, neriuutiginerarpaa Kalaallit Nunaanni pissaatikitsut Inuit Ataqatigiit malunnaatilimmik ikiorsiiffiginiarumaaraat. Arnat amerlasuut qinigaanerat maluginiarnerarpaa, Islandimilu ungasinngitsukkut qinersinermi arnarpassuit qinigaanerat aamma eqqaallugu nuannaarutiginerarlugu.
Danskit partiivisa allaffeqarfiini taamaallaat Siumup tapersersortitoqai Socoaldemokratit allaffianni Inuit Ataqatigiit Siumumik suleqateqarusugatik aalajangereersimanerat uggorineqarpoq. Talerperliilli kinguariarnerpaammata, Siumullu kinguarialaaginnarmat, iluarusuutigineqarpoq. Kalaallit Nunaat pillugu oqaaseqartartuat, Mogens Jensen oqarpoq, qinersisartut Naalakkersuisunik taarseerusulersimanerat paasilluarsinnaallugu.
- Kisianni Inuit Ataqatigiit pilluaqqorusuppakka, Siumumillu taakkua suleqateqarusunngikkaluartut, qinersisartut suli Siumumik tatiginnillutik taaguussilluarsimanerat maluginiarpara, Mogens Jensen oqarpoq.
Qinersisartut kiinnanik nutaanik takorusulernerat tupinnanngilaq, tupinnarneruvorli partiip ataatsip ukiuni 30-ni naalakkersuinerup iluani pissaaneqarnerusimanera. Partiini kinguariartuni pisarnertut Siumukkut imminnut qiviartussanngorput iluarsaattariaqakkallu ammasumik oqallisigisariaqalerlugit, Socialdemokratineersoq, Mogens Jensen, oqarpoq.