Qinersineq upalungaarsimaffiussaaq

februaarip 07-at 2005 16:10

Folketingimut aqagu qinersinissami Danmarkimi qinersivinni isumannaallisaaneq siornatigornit annerussaaq. New Yorkimi 2001-mi saassussineq Spaniamilu siorna qinersisoqarmat qaartartumeerineq isumannaallisaanerup sakkortusineranut pissutaasoq, vicepolitikommissær Flemming Steen Munk, Københavnip politiivineersoq Danmarkip radioanut oqarpoq.

-Qinersinissamut tunngatillugu sioorasaarisunik tusanngikkaluarpugut, taamaattorli qinersineq akornusersorneqaqqunagu aalajangerpugut nalunartut pillugit sillimaniarneq annertusineqassasoq, taamalu politiit amerlanerusut sulisinneqassasut, Flemming Steen Munk oqarpoq.

Taama upalungaarsimaneq nunatsinniissaaq pissasoq politimester Anders Linnet ilisimatitsivoq.

- Politiit isertortumik paasiniaasarfiata PET-p upalungaarsimaqqusinera maani aamma malissavarput, qinnuigineqarpugummi Danmarkip Irakimi sorsoqataanera pissutigalugu nakkutilliineq annertusissagipput, Anders Linnet oqarpoq.