Qinersineq Illoqqortoormiuni ammareerpoq
Taamaallaat Illoqqortoormiuni qinersineq katersortarfimmi maanna ammarneqaqqammerpoq, Illoqqortoormiunimi, nalunaaqutaq akunnermik ataatsimik siulliummat.
Nunatsinni qinersiviit tamarmik unnugu arfineq-pingasut tungaanut ammassapput.
Uani qinersinermi taasisinnaasut 40.808-pput, Folketingimut novembarip ulluisa 13-ianni 2007-imi qinersigatta taasisinnaasut 39.706-iusimallutik. Taasiartortut taamani procentiat 64,5 procentingajalluinnaavoq.
Folketimgimi inissat 179-iupput, Nunarpullu marlunnik ilaasortaatitaqarpoq. Maannalu qinigassanngortittut 16-iupput. Partiit qinigassanngortitsisut, tassa Inuit Ataqatigiit, Siumut, Demokraatit Atassullu tamarmik sisamanik qinigassanngortitsipput.
Qinersinerup inernera unnuaru unnup-qeqqata missaani aatsaat naammassissangatinneqarpoq, qinigaanermullu allakkat uppernarsaatit, Juliane Henningsenip Inuit Ataqatigiinneersup, aamma Lars-Emil Johansenip, Siumumeersup, taartissaannut Nunatta Sinniisaata kinguninngua tunniutissavai.
Qinersineq KNR-ip qanimut soorunami malinnaavigissavaa - Danmarkimi Nunatsinnilu. Qinersivinni arlalinni taasiartortut procentiat ulloqeqqaanerani unnugulu Radioaviisimi tusarliunneqassaaq, qinersineq qanoq soqutigineqartiginersoq paasiniarlugu.
Danmarkimi qinersineq KNR TV-mi aallakaatinneqassaaq, nalunaaqutaq pingasunut tanneq quliniit unnugu nalunaaqutaq qulingiluat tungaanut tamanna pissalluni, tassa nalunaaqutaq qulingiluanut Nunatsinni qinersineq malinnaavigilissavarput.
KNR Radio unnugu qulingiluaniit aamma aallakaatitsissaaq. Qinersineq naggaserlugu partiit siulittaasui pisarnertut oqallitsinneqassapput. Qinersinerup inernera unnuaru unnuap-qeqqata missaani saqqummiunneqarsinnaassangatinneqarpoq.
