Qineqqusaartut kinguarsaasimapput

Nuna tamakkerlugu qinersinerup inerneri unnuaq aatsaat nalunaaqutaq pingasunngulersoq nalunaarutigineqarput. Kisitsiniarnerup sivitsortuuleraluarneranut assigiinngitsut peqqutaapput – ilaatigut qineqqusaartut kisitsinermut akuliunniaqattaarnerat kinguarsaataasimavoq. Tamanna soorunami inerteqqutaalluinnartoq Namminersornerullutik Oqatussani allaffimmi pisortaq, Leif Scharling oqarpoq.
Allattoq Najaaraq Egede
apriilip 09-at 2008 18:49

Leif Scharling oqarpoq qinersinernut kingullernut marlunnut naleqqiullugu maanna kisitsineq naammassiaarnerusoq. Unnuap qeqqata missaani kisitsinerup naammassinissaa ilaannit naatsorsuutigineqarsimagaluarpoq, nalunaaqutarli marlup eqqaani kisitsineq naammassivoq.

- Kisitsinerup sivitsortuuleraluarneranut peqqutaasut ilagaat maanna qinersineq pisariunerujussuummat, qineqqusaartummi amerlaqaat nutaarluinnarmillu nalilersuisoqartussaalluni. Assersuutigalugu qinersinermi kingullermi Illoqqortoormiuni marlussuinnaat qinerneqarsinnaasimasut maanna kommunerujussuanngortussanngorneq pissutigalugu Illoqqortoormiuni qinersisartut qineqqusaartunik 116-inik taasisinnaasimapput, Scharling nassuiaavoq.

- Taavalu ajoraluartumik kommunini marlussunni aamma qineqqusaartut kisitsinermut akuliunniaqattaarsimapput kinguarsaataasumik. Soorunami qineqqusaartut kisitsinermut akuliuttussaanngillat, kisitsisulluunniit qanillisussaanagit, oqarpoq.

Kisitsinermut akisussaasuusut Namminersornerullutik Oqartussanut unnuup ingerlanerani sianertarput qineqqusaartut kisitsinermut akuliunniarsarisut avoqqaaralugit, taakkualu oqarfigineqartarput qineqqusaartut kisitsivimmiit anisissagaat teqeqqumiluunniit utaqqitissagaat, kisitsinermut akornutaassanngimmata, Leif Scharling oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq