Qineqqusaartut inuusuttut: Sulinermut akisussaaffeqarnerulerta
Ajornartorsiut taanna qineqqusaartut inuusuttut marluk allanngortinniarniarpaat.
Nunatsinni suliffissaaleqisut 3000 missaanniipput, taakkualu amerlavallaqaaat.
Ikilisinniarutsigilli ajornartorsiutip suna qiterineraa, 21-nik ukiullip Ineqi Kielsenip siumut tunuliaqutaralugu qineqqusaartup eqqartorneqartariaqalersoraa.
- Isumaqarpunga qaangerniassagaanni suliffissuit sinnattoriuakkagut tunukkallalaarlugit inuiaqatigiinni ajornartorsiutaasup qiterpiaata nassaarinissaa ujartortariaqaripput, Ineqi Kielsen KNR-imut oqarpoq.
Suliffissaaleqisulli saniatigut aamma ajornartorsiummik saqqummersoqartuarpoq. Fabrikkini sulisussaaleqisoqartuarpoq, suliffinnilu amerlasuuni nunanit allaneersut sulisorineqartartut amerliartuinnarput. Nunatta Naatsorsueqqissaartafia naapertorlugu ukiut arfinilli ingerlaneranni 400-nik amerlisimallutik. Tamanna Ineqi Kielsenip peqquteqarsoraa.
-Sooq suliartortartut suliartorneq ajorpat, tassaniissimassooq suliffissaaleqineq, Ineqi Kielsen KNR-imut oqarpoq.
Nivi Olsenip Demokraatit tunuliaqutaralugit qineqqusaartup takornariartitsisarnermi suliffiit sapaatip akunnera kingulleq isummersorfigaa.
Ilulissani takornarianik sullissisut nunaqavissut ikippallaarnerarpai.
Tamatumanili aamma sulinermik nakkutigininnngitsoqartarnera peqqutaasoraa.
Tassa suliartortanngitsut peqqutaallutik, ilumut suliartortartut sulisinnanngitsutut isigineqarsimasorigamigit.
- Tatigineqarnerput privatiniik appasippallaarujussuarpoq, Nivi Olsen KNR-imut oqarpoq.
Nunatsinnilu piumassusilinnut kingunipiloqarnerarpaa.
- Ullaakkut makissinnaasunut akisuallaarujussuarpoq isigineqarnerput. Oqimaattumik perorsarneqartut nammanniarsarineri taakku akisuallaalerpoq, akisussaaffimmik tigusisariaqalerpugut ullumiminngaanniit kingusinnerpaamik, Nivi Olsen KNR-imut oqarpoq.
Ajornartorsiutaasut ukiorpassuarni eqqartorneqartarput, Ineqi Kielsenillu allannguisoqarnissaa piffissanngorsoraa.
- Takusarparput suliffissarpassuaqartoq, imaassinnaavoq nunaqavissunut tunngatillugu suliffeqarnikkut politikkerput sukateriffigineqartariaqartoq. Inuttut ajornartorsiutillit, suliartornissaminnut piukkunnanngitsut aamma piukkunnarsarneqartariaqarput. Ukiunilu arlalissuarni aningaasarpassuit tassunga atorneqartarsimapput, aningaasallu atorneqartartut kinguneqartariaqalerput, Ineqi Kielsen KNR-imut oqarpoq.
Nivi Olsenili siusinnerusumi aallartinnissaq pisariaqarsoraa:
- Meerartagut pitsaanerusumik perorsarsinnaavagut sunniuteqassapput sulisinnaanermut. Sulisinnaalerlugit perorsartariaqarput ajornartorsiut tassaniimmat, Nivi Olsen KNR-imut oqarpoq.
Aamma suliffeqarfiit nunaqavissunik sulisoqarnerunissamik iliuuseqartariaqalersut Nivi Olsenip kajumissaarutigaa.
- Unammillertigit, inuiaat allat unammillertigit. Thailandermiut tikittartut unammillertigit, taava tassanngaanniit isigineqarnerput allanngussooq, Nivi Olsen Demokraatineersoq KNR-imut taama oqarpoq.