NALILIINEQ Qineqqusaarneq Siumup aallartippaa
Siumut partiini siullersaalluni qineqqusaarutissatik saqqummiuppaat. Pilersaaruterpassuit pilersinneqassappata aningaasarpassuarnik akeqartussat siulittaasup ullumi saqqummiuppai.
Inuussutissarsiutitigut ingerlatsisunut akileraarutip appartinnera, utoqqarnut ikiuisarneq akikinnerulersinnera, namminersorlutik oqartussat suliffeqarfiutaanut piumasaqaatikinnerulerneq inatsisartunut qinersinissamut Siumup qineqqusaarutaasa ilamerngi taama ilaatigut imaqarput.
Kim Kielsenip saqqummiussaasa aamma ilagaat, siumumi aqutsisut nutaat kissaatigigaat illusinermi attartortariaatsip ingerlanneqarnera atuutsiinnarnissaa taavalu innaallagissamut, imermut kiassarnermullu assigiimmik akeqartitsinerup eqquteqqinneqarnissaa, illoqarfiit erngup nukinganik innaallagissiuteqartut nukissiorfimmut akiliutissanut akilersuilerneranik kinguneqartussaq. Utoqqalinersianut Siumut aamma aningaasartuuteqarniarpoq, aapparisap isertitai eqqarsaatigineqaratik utoqqalinersiassat inissinneqartalerneratigut.
Tamakku tamarmik aningaasarpassuarnik naleqartussaapput, aningaasat naaleerukkiartornerani nunatsinnilu kommunit sipaarniarnerisa nalaanni. Siumup siulittaasortaava aperaarput aningaasat sumut aaneqassanersut:
- Maani nunatsinni saarullik 40 procentiinnaa atorneqartarpoq, sanilerisatta 93 procentia atortarpaat. Tassuuna piisaapiluppallaaqaagut atorluaasariaqarpugut, aningaasammi eqqaannarpagut, Siumut siulittaasua Kim Kielsen taama oqarpoq.
Nunatsinni politikkikkut malinnaasut siunnersuutaasut tusartareerpaat. Ullumimiit annertunermik aalisakkanik suliaqarnerup nunatta karsianut aningaasanik isertitsissutigissagipput. Ilumoortorli unaavoq, aalisakkeriviit aalaakkaasunik piukkunnaateqartunillu sulisussanik pisariaqartitsipput, nunatsinni suliffissuarni ingerlatsinerput ullumikkut eqqarsaatigalugu, taamaattumik qanoq ililluta suliffissuarni ingerlatsineq annertusisinnaavarput?
Siumumiilli akissutit ilagaat sulinermut atatillugu ilanngaat eqqunneratigut. Suliffissaaleqisut taamaalillutik sulerusussuseqalissapput, assersuutigalugu aalisakkerivinni sulisussanik amigaateqartoqartillugu.
