Qimuttuisut marluk apormata inuit qulit ajunaarput

Qimuttuitsut Tysklandip kujataani naalagaaffiup immikkoortortaani Bayernimi marlunngornermi ullup qeqqanut aporfiannit toqusimasut qulissaat annaassiniartuniit qaqinneqarpoq.

Inuit marluk suli maqaasineqarput, inuillu 100-t tungaanut ikilersimasutut nalunaarutigineqarlutik, taakkunannga 50-it ikilertiterujussuarsimasut. Tysklandimi politiit tamanna paasissutissiissutigaat.

Qulini ajunaartuni qimuttuitsuni aquttut akornaniipput, tyskit oqartussat The Mirror uppernarsarpaat. 

Tamannalu ilutigalugu oqartussaasut paasissutissiissutigaat qimuttuitsut marluk apornerat sangoriami pisoq, taamaammallu qimuttuitsut 120 kilometerersortillutik apunnginneranni aquttui imminut takusinnaasimanngitsut.

Ajutoorneq nalunaaqutaq 06.48 Holzkirchemiit Rosenheimip akornani, Münchenimiit 60 kilometerit missaani kangiata-kujasinnerusortaani pisoq, tyskit aviisiat Bild allappoq.

- Qimuttuitsut siumikkut aporput, tyskit politiivini oqaaseqartartoq Martin Winkler Reutersimut oqarpoq. 

Tyskini tusagassiutini assit takutippai ambulancit helikopterimillu annanniutit annaassiniarnermi peqataasimasut. 

- Tamaani ukioq manna aatsaat taamak ajortigisumik ajutoortoqarpoq, amerlasuunilli nakorsaateqarpugut helikoterillu, Stefan Sonnetag oqarpoq. 

Qimuttuitsut nalinginnaasumik meeqqanik atuartunik angallassisartuusut politiit oqaatigaat. 

- Qujanartumilli ukiuunerani atuanngiffeqarfiuvoq, politiit nalunaarutigigaat Bayerischer Rundfunk oqarput.

Sooq apornersut suli ilisimaneqanngilaq.

Politiit misissuillutik aallartipput, sooq qimuttuisut siumikkut aporsimasut paasiniarniarlugu, Reuters allappoq. 

Qallunaanik ajunaartoqarsimanersoq nalunaartoqanngilaq. 

Nunat allanut ministereqarfiup innuttaasunik sullissivia paasissutissiivoq. 

 /ritzau/AFP