Nunavik: Qimussimik sukkaniunneq Ivakkak aallartittoq
Qimusserlunimi sukkaniunneq Ivakkak, 500 kilometerit missaannik isorartussusilik ullumi aallartissaaq:
Qimusserluni Nunavimmi sukkaniunneq Ivakkak ukiut ingerlanerini tallimassaa aaqqissuunneqarpoq.
Ukiuni kingullerni sukkaniuttoqaraangat ingerlaarfiit assigiinngitsut atorneqartarsimapput, ukioq mannali ingerlaarfitoqaq atorneqassaaq, Umiujaq-miit Hudsonip kangerliumanersuata sineriaa atuarlugu nunaqarfinnut Inukjuaq-mut Puvirnituumut Akulivimmullu ingerlaartoqariarluni nunaqarfimmi Ivujivimmi apuuttoqassaaq.
Naggueqatigiit Inuit kulturiata ilaata tamanut taamatut saqqummiunneqarsinnaanerata tulluusimaarutigineqarsinnaanera, Makivik Corporationimi vicepræsidentip Andy Moorhousep tusagassiuutinut nalunaarummi ilaatigut oqaatigaa.
- Inuusuttavut utoqqartavullu inooriaatsimik taamaattumik takutitsilluartuaannarput, Andy Moorhouse oqarpoq.
Naggueqatigiillu Inuit qimmiinik qimuttunik taama takutitsisoqarnera ukioq manna pingaartinneqarpoq. Qimuttummi ukioq manna toqorarlutik nungungajavissimapput, sukkaniunnermulli tassa peqataaqqillutik:
- Naggueqatigiit Inuit qimuttuinik ukioq manna peqataatitaqarsinnaanerput nuannaarutigaarput. Naggueqatigiimmi Inuit Issittumi inuusinnaanissaasa qulakkeerneqarnissaa pingaartikkatsigu, Andy Moorhouse oqarpoq.
Holdit 13-it, tamarmik immikkut marlunnik qimussiussisullit, Ivakkammik taallugu qimusserluni Nunavimmi ukioq manna sukkaniunnermi peqataapput uumasullu nakorsaannit alaatsinaatunillu allanik malinnaaavigineqarlutik.