Qimussertartut nunanit tamalaaneersut Sisimiuni aappaagu naapisimaalersut
Qimusserneq Alaskami, Canadami, Nunatsinni Ruslandimilu Siberiami assartuinermut, sunngiffimmi sukisaarsaarutitut takornariartitsinermilu atorneqartarpoq. Qimussertartut nunanit tamalaaneersut Sisimiuni ukioq ataaseq qaangiuppat naapeqatigiissinneqartussanngorput.
Suliummik ingerlatsisoq tassaavoq, Pipaluk Lykke Løgstrup, taannalu aliannaarsaarniaannartuunngilaq. Anguniakkammi ilagaat nunap immikkoortuini qamutit assigiinngitsut katersornissaat.
- Qimussertartut nunagisaminni qanoq qamusiortarnerlutik takutissavaat, taamaaliornikkut naggueqatigiit Inuit qamusiaannik maani illoqarfitsinni pigisaqalerniassagatta.
Nunanit tamalaaneersut Sisimiuni naapisimaassapput
Qamutit kingorna Sisimiuni Katersugaasivimmut tunissutigineqassapput. Aappaagu naapisimaarnissami qimussertartut nunatsinnit tamaneersut aamma USA-meersut, Ruslandimeersut Canadameersullu oqalugiartinneqassapput najukkaminnilu qamusioriaatsiminnik takutitsissallutik.
- Ataatsimeersuartoqassaaq, tassungalu aggersarniarpagut Tjukotkami, Alaskami, Canadami Nunatsinni qimusserfiiusartuneersut pikkorissut ataqqissaasullu, sisimiormiu Pipaluk Lykke Løgstrup, nunatsinni assiliisartut suleqatigalugit assilissanik atuakkamik "Isi Øje Eye"-mik atuakkiortutut ilisarisimaneqartoq taama oqarpoq.
Qimussertartut Sisimiuni ataatsimeersuartinnissaat aappaagu ulluni decembarip tallimaani arfernanilu pissaaq.
