Qimmiaqqat akiuussutissamik kapineqassasut
Upernaviup pigisaani Naajaani qimmit arfineq marluk qimmit nappaataannik toqquteqarsimasut maajip ulluisa qulingiluaanni ilisimatitsissutigineqarpoq, tamatumalu kingunerisaanik pisortat Naajaani pisut pillugit malinnaapput.
Qimmillu nappaateqalernerat suli aarlerinarsinnaasoq, VFMG naliliivoq.
Naajaani inuttaasooq KNR-imut oqaluttuarpoq, qimmit marluk tallimanngormat maajip ulluisa 19-anni nappaateqarsimasinnaanerat pasinarmat toqunneqarsimasut.
Naajaani innuttaasut maannamut 50-t missaanniipput, qimussinillu nigittagarsorluni aalisariartoqartarmat qimmit pinngitsoorneqarsinnaanngillat.
Uumasunut Nakorsaqarfik Inuussutissalerinermillu Oqartussaaffiup innersuussutigivaa qimmiaqqat sapaatit akunneri aqqaneq marlunnik sapaatillu akunnerinik 16-inik, ukiumillu ataatsimik utoqqaassusillit akiuussutissamik kapineqartassasut. Kingornalu qimmit ukiut pingasut qaangiukkaangata akiuussutissamik aamma kapineqartassasut.
VFMG naapertorlugu qimmit inuusunnerusut nappaammik eqqorneqarnerusarput qimmilli aamma inersimasut aamma tunillatsissinnaapput.
Avannaani qimmit 400-t qimmit nappaataannik siorna toqquteqarput. Qimmit nappaataannut perlerornermullu qimmit tamarmik akiuussutissamik kapitinneqartassasut inatsisartut siorna ukiaanerani akuersissutigaat.
Qimmit qimuttut savaateqarfinnilu qimmiutigineqartut akiuussutissinneqartarnerat Namminersorlutik Oqartussanit akilerneqartarpoq, qimmilli naliginnaasumik uumassutigineqartut akiuussutissinneqarnissaannut piginnittut akisussaapput.
