Qimaasut pillugit Savalimmiuni aamma oqallittoqalerpoq

- Nunanit allaneersut qineqqusaarnermi eqqartorneqangaatsiarput, soorlu aamma Europami nunani killerni taamaattoqartoq. Nunanit allaneersut qimaasullu qitiutinneqartut inunnik isumasiuinerit takutippaat. Savalimmiut qimaasunik inissaqartitsisariaqarnerannut Savalimmiuni naalakkersuisut siulittaasuata Kaj Leo Holm Johannesenip, Sambandspartiimeersup, ukiortaami oqalugiarnermini oqaatigimmaguli qimaasut pillugit oqallinneq aallartippoq, Lars Hovbakke Sørensen nutaarsiassaqartitsivimmut Ritzauimut taama oqarpoq.

Qimasunik inoqutigiinnik 60-inik Savalimmiut inissaqartitsisariaqartut Savalimmiuni naalakkersuisut siulittaasuata oqalugiarnermini ilaatigut oqaatigaa. Taamatulli oqarnera Savalimmiuni innuttaasunit nuannarineqarpallaarunanngilaq, tassami Sambandspartietimik tapersersuisut ikiliartupiloorsimasut inunnik isumasiuinerit kingulliit takutippaat.

Suliat allat Savalimmiuni naalakkersuisut siulittaasuannut aamma ajornartorsiortitsipput, Socialdemokratillu partiinik allanik suleqateqarlutik Savalimmiuni naalakkersuisuutitaqalersinnaanissaat ilimagineqarpoq, Republikanerit, Høgni Hoydal siuttoralugu, suleqatigineqarsinnaasunut ilaallutik. Lars Hovbakke Sørensen taama oqarpoq.

Socialdemokratit siulittaasuata Aksel V. Johannesenip naalakkersuisunut siulittaasunngornissaa taamaammat ilimanarsinnaavoq.

Savalimmiut Danmarkimit avissaarsinnaanissaat suleqatigisinnaasaata Høgni Hoydalip sulissutigiuarnikuuaa. Savalimmiut tunngaviusumik inatsiseqalersinnaanissaanut innuttaasut kingusinnerpaamik aappaagu 2016-imi taasitinneqarnissaat Republikanerit anguniagaraat, marlunngorpallu qinersinermi inernerit takutikkumaarpaat tamanna piviusunngorsinnaassanersoq.

- Namminersulivittutut immitsinnut suaarutiginninnerput takorloorsinnaavara, Høgni Hoydal Jyllandspostenimut oqarpoq.