Assi: Kommuneqarfik Sermersooq

Qimaasoqarnera Kommuneqarfik Sermersuup ajuusaarutigaa

16-inik ukiulik, politiinit ulorianartutut taaneqartup, kommunimit nakkutigineqartilluni marlunngornermi unnukkut qimaanerata kingorna Kommuneqarfik Sermersuup ingerlatseriaasertik misissortussanngorpaat.

Meeqqanut, Ilaqutariinnut Atuarfeqarnermullu ingerlatsivimmi pisortaq, Søren Valbak pisoq pillugu utoqqatsivoq.

- Aap, soorunami ajuusaarpunga oqartussatut suliassarput naammassinnginnatsigu, Søren Valbak KNR-imut oqarpoq.

Angut inuusuttoq qimaammat qanorpiaq pisoqarsimanersoq kommunip maanna paasinialerpaa, qimaasorlu kommunimit nakkutigineqartilluni qimaasimasoq, Søren Valbakip uppernarsarpaa. 

- Aap, politiit inaataanni uagut nakkutigaarput. Tassanngaanniillu qimaavoq, Søren Vaæbak nassuiaavoq.

Politiit naapertorlugit 16-inik ukiulik ulorianartuuvoq, inuillu ulorianartutut nalilerneqarsimasut sullinneqartarnerat pillugu kommunip ingerlatseriaasini misissornialerpaa.  

- 16-inik ukiulimmik nukittuumik namminerlu aalajangersinnaasumik paarsinissartik sulisutta ilinniarsimanngilaat, taamaammat pisumut assingusumut pisoqaqqissagaluarpat qanoq iliussanerluta nalilersuissaagut, Valbak oqarpoq.

Aamma atuaruk Politiit: Angut inuusuttoq ujaarineqartoq nassaarineqarpoq

Pisoq ilungersunartoq pillugu oqaloqatigiissutigineqarnissaa anguniarlugu kommunip politiit aasap kingorna ataatsimeeqaatigissamaarpai.

- Isumaginninnikkut oqartussat politiillu, soorlu sulianut uunnga assingusunut pisoqartillugu, suleqatigiinnerat qanoq qaninnerulersinnaanersoq misissussavarput, Søren Valbak oqarpoq.

Qimaasoq politiinit nassaarineqarnissaa kommunimit maanna utaqqineqarpoq. 

 - Tasiilamiit Sisimiunut piaarnerpaamik timmisartuunneqarnissaa politiillu suleqatigiissutigisariaqarparput. Sisimiuni inuusuttuaqqanut pinerluuteqarsimasunut immikkoortortamut immikkut isumannaallisakkamut inississinnaavarput. Tassa iliuuserisinnaasarput, Kommuneqarfik Sermersuumi Meeqqanut, Ilaqutariinnut Atuarfeqarnermullu ingerlatsivimmi pisortaq, Søren Valbak oqarpoq.

Søren Valbak inuusuttoq 16-inik ukiulik politiiinit suli nassaarineqanngitsoq taama KNR-imut oqarpoq.

 

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!