Qilalugarniarnermi unioqqutitsisarnerit pinngitsoortinniarpaat

januaarip 12-at 2005 06:42

Kitaata avannaani Kitsissuarsuit Qeqertarsuullu eqqaanni qilalugarniarneq aallarteruttorpoq, tamatumunngalu atatillugu qilalugarniarnermi malittarisassanik unioqqutitsisoqarneraasunik arlalinnik Aalisarnermut Piniarnermullu Pisortaqarfik nalunaarfigineqartartoq, allaffiup pisortaa Ole Heinrich ilisimatitsivoq.

Unioqqutitsisimanernillu nalunaarutigineqartut najukkani politiinut misissugassanngorlugit nalunaarutigineqareersut Ole Heinrich allappoq.

Tamatumunnga atatillugu Piniarnermut Pisortaqarfimmit erseqqissaatigineqarpoq qilalukkat piniagaanerat illersugaanerallu pillugu nalunaarut malillugu qilalukkat piaqqat arnavissallu piaqqisartut nunatsinni tamarmi eqqissisimatitaammata. Qilalugarniassagaannilu akuersissummik peqarnissaq piniariarnermilu taassuma nassartarnissaa aamma erseqqissaatigineqarpoq.

Kiisalu angallatit 20 brutto register tonsimit anginerusut qilalugarniarnermi atorneqaqqusaanngitsut, Piniarnermut Pisortaqarfimmit erseqqissaatigineqarpoq.

Avannaani qilalugarniarneq aallartimmalli silarlukkajunneratigut Upernavimmi qaqortartassanit 134-init 20-iinnaat maannamut pisarineqarsimapput. Uummannap kommuneani qernertartassanit 88-init maannamut 30-iinnaat pisarineqarsimallutik. Vajgatsimissaaq qaqortartassat ilaminiinnanngui maannamut pisarineqarsimapput.