ASSIT Qeqqata Kommunianit Maniitsumi Sisimiunilu ataqqinaammik nersornaasiisoqarpoq

Sisimiormiu Birgithe Johansen ukiorpassuarni KGH-mi Brugsenimilu sulisimanerminut, illoqarfimmilu peqatigiiffinni arlalinni aningaaserisuunerminut ataqqinaammik nersornaaserneqarpoq.

Sisimiormiu Samuel Olsen ataqqinaammik nersornaatisivoq KGH-mi allakkanik aatsisartooriarluni, kingorna politiitut sulisimanini pillugit, ukiorpassuarnilu qatserisartuusimanini aammalu sisorartartuusimanini pillugit.

Martha Olsen kiffaaqqaarsimasoq ataqqinaammik nersornaatisivoq. Kingorna asaasuusimavoq, atuarfimmi kaffiliortuusimalluni kingornalu meeqqerisuusimalluni.

Maniitsumi ataqqinaammik nersornaatisisuuvoq Maniitsumi inunngorsimasoq Karl Asser Møller. Taanna Maniitsumi timersoqatigiinnik aallartitsisimavoq, inuusuttuullunilu aalisariummi naalaganngorsimalluni, kingorna pisiniarfiutitaarpoq maanna allamit ingerlanneqartumik.

Aamma Ole Kreutzmann ukioq manna ataqqinaammik nersornaatisivoq. Suliffissuarmi sulisimavoq, sisorartartuusimalluni, kingornalu kommunalbestyrelsimi ilaasortaasimalluni borgmesterimullu tullersortaasimalluni.

Maniitsormiu alla ataqqinaammik nersornaaserneqartoq tassaavoq peqqinnissaqarfimmi sulisimasoq Lene Møller. Taanna Maniitsumi peqqissaaviup ingerlalluarneranut sunniuteqarluarsimanini nersornaserneqaatigaa.