Qeqqata Kommuniani borgmesterip Kielsen taperseraa

Qeqqata Kommuniatami borgmesteriata Malik Berthelsenip ullumi nalunaarutigaa Kim Kielsen siulittaaginnartussatut tapersersorlugu. Malik Berthelsenip borgmesteriutit siuliata Hermann Berthelsenip Kim Kielsenimik tapersersuinini sapaatip-akunnerata siuliani nalunaarutigaa.

Politikkikkut unneqqarinneq, tatiginassuseq innuttaasullu akornanni toqqissisimanissaq Nunatta ingerlanneqarnerani pingaarnerpaasut, Malik Berthelsenip Kim Kielsenimik tapersersuinerminut atatillugu oqaaseqaateqarnermini oqaatigaa:

- Tamanna tunngavigalugu Siumup nuna tamakkerlugu ataatsimeersuarnissaani, Kim Kielsen Siumup siulittaasuatut ingerlaqqinnissaa neriuutigaara, isumaqarama tamanna nunatta Siumullu isigineqarneranut pitsaanerpaasoq, Malik Berthelsen oqarpoq.

AAMMA ATUARUK Siumup siulittaasuata taarsernissaanut piffissaanngilaq

Nunatta namminiilivinnissaata piaarnerpaamik anguneqarnissaa Vittus Qujaukitsup Siumumi siulittaasussatut sassarnermini pingaarnertut suliniutiginiarpaa, Malik Berthelsenilli tamanna illuatungilerpaa:

- Piaarnerpaamik namminiilivinnissamik taamaallaat siunertaqarluni siulittaasumik taarsiiniarneq isumaqarpunga tulluartuunngitsoq, innuttaasulluunniit oqaluttuussinnaanagit ukiumut 5 milliardit koruunit tungaannut suminngaanniit matussuserneqassanersut, Malik Berthelsen oqarpoq.

AAMMA ATUARUK Kim Kielsen siuttuuvoq katersuuffiusoq

Nunatta nammineq kiffaanngissuseqarfigalugu oqartussaaffigilernissaa tamatta kissaatigigipput Malik Berthelsenip tusagassiuutinut nalunaarummi allaaseraa, tamannali anguneqassappat ilinniarsimassutsikkut aningaasatigullu imminut napatissinnaanermik aamma pisussaaffiliisoq, imaaliallaannarlugulu tamanna anguneqarsinnaanngitsoq.