Qeqqata Kommunia Kangerlussuarmi nutaamik umiarsualiviliorusuttoq
Kangerlussuarmi umiarsuliviliornissaq 33 millionit koruuninik akeqassasoq ilimagineqarpoq. Nunatsinni inuiaqatigiini inuussutissarsiutitigut ineriartortitsinissamut aningaasaliissuteqarnissaq pitsaanerpaasoq, Qeqqata Kommunia isumaqarpoq, aningaasallu pineqartut ukiut pingasut-sisamat ingerlanerinnaanni utertinneqarsimanissaat ilimagineqarluni.
Kangerlussuarmi umiarsualivittaarnissaq pisariaqarluinnartoq, Qeqqata Kommunia isumaqarpoq, maannami umiarsualivik 2 meteriinnarnik itissuseqarmat. Tamanna pissutaalluni umiarsuit pajuttaatit umiarsuillu takornariartaatit umiarsualiviup avataatungaani kisartariaqartarput, soorlu aamma umiaasaaqqat umiatsiallu nassiussanik ilaasunillu ikaassuisoqartariaqartartoq.
Naak Kangerlussuarmi pissutsit maanna atuuttut pitsanngitsutut nalilerneqaraluartut, umiarsuit takornariartaatit minnerit Kangerlussuarmi ilaasunik paarlaatsitsisassallutik toqqarsimavaat, umiarsuilli takornariartaatit annerusut nunani eqqaamiuusuni ilaasunik paarlaatsitsisarlutik. Tamatuma kinguneraa Kalaallit Nunaanni mittarfeqarfinnut akitsuutinik isertitassanik kaaviiaartitassanillu annaasaqarneq, Qeqqata Kommunia tusagassiuutinut nalunaarummi ilaatigut allappoq.
Kangerlussuarmi umarsualivimmik pilersitsinissamut periarfissat, Rambøllip ARTEK suleqatigalugu misissorsimavaa.
