Qeqqata kommunea piareerpoq

Sisimiut Maniitsorlu kommunitut kattuppata taakkua allaffeqarfiisa qullersaqarfii Borgmestereqarnerlu Sisimiuni inissisimalissapput.
marsip 26-at 2008 13:49

Sisimiut Maniitsorlu kommunitut kattuppata taakkua allaffeqarfiisa qullersaqarfii Borgmestereqarnerlu Sisimiuni inissisimalissapput. Borgmester Hermann Berthelsen, Siumut, oqarpoq kattunnissamut piareerlutik, kattunnerlu piviusunngorpat innuttaasunik sullissineq pitsanngussasoq. Borgmester Hermann Berthelsen oqarpoq kattukkunik sakkussat nutaat, sulisut ilinniarsimasut allallu sulisut ilinniarluarsimasut pigilertussaagitit taamaammallu naatsorsuutigineqassasoq kiffartuussinerup pitsanngoriarnissaa. Borgmester Hermann Berthelsen aamma oqarpoq ukiut kingulliit pingasut sisamat oqartussaaffinnik tigusinissartik sukumiisumik oqallisigereersimagitsik malitsissaalu nalilersorluareerlugit. – Kommuninut siullernut ilaalluta nalilersuilerpugut taamaattumik Namminersornerullutik Oqartussaniit oqartussaaffinnik tigusinissarput aamma piareersimaffigaarput, Hermann Berthelsen oqarpoq nangipporlu: oqartussaaffit agguarnissaat inatsisinngoreerpoq, aningaasartaqarnissaat naatsorsuutigereerparput tamaattumik tigusinissatsinnut piareerpugut.

Sisimiut Maniitsorlu kattuppata, Maniitsumi akileraarut 26 procentiusoq procentimik ataatsimik appartinneqarnissaa siunniunneqarpoq.