Ujaasineq: Inuit sisamat Qeqertarsuup Tunuani ajunaarsimassangatinneqartut
Inersimasut tallimat Aasianniit Ilulissanukaarlutik sisamanngornermi ualikkut aallarsimapput, ingerlaartillutilli angallataat immakkiartulermat VHF-ikkut ajunaalernermi kalerrisaaruteqarsimapput.
Aasiaat Raadioanit ajunaalernermi kalerrisaarut tusarneqarmat politiit kalerrinneqarput, tamatuma kingunitsianngua annaassiniarneq umiatsiaaqqamillu inunnik tallimanik ilaasoqartumik ujaasineq aallartinneqarpoq. Issittumi Sakkutooqarfik, Air Greenland, Politiit inuillu kajumissutsiminnik ujaaseqataasut, Ilulissani politiit paasissutissiipput.
Ujaarineqartunit ataaseq ajunngitsoq nassaarineqartoq, ataaseq ajunaarsimasoq pingasullu suli maqaasineqartut politiit sisamanngornermi nalunaaqutaq 22.50 nalunaarutigaat. Inuit pingasut suli nassaarineqanngitsut maanna politiinit ajunaarsimassangatinneqalerput.
Tallimanit ujaarineqartunit annattutuaq Ilulissanukaanneqarpoq. Ajunaarnermi qanorpiaq pisoqarsimanera politiinit paasissutissiissutigineqarsinnaanngikkallarpoq. Tammaaneqartut pingasut ujaarineqarnerat ingerlanneqaannarallassasoq politiit sisamanngornermi unnukkut paasissutissiipput.