Qeqertarsuarni Siumut IA-lu suleqatigeeqqilerput
Qeqertarsuup Kommuneani kommunalbestyrelsemi Siumut Inuit Ataqatigiillu sapaatip-akunnera kingulleq suleqatigeeqqilerput, taamaalilluni IA-mik suleqateqarnermik atorunnaarsitsinerigaluaq ullormik ataasiinnarmik sivisussuseqarpoq.
Allattoq Louise M. Kleemann
Qeqertarsuarmi Siumup suilersuisuisa sisamanngormat aalajangerpaat Siumup Inuit Ataqatigiinnik suleqateqarnerminnik atorunnaarsitsimanerat eqqunngitsumik tunngaveqartoq.
Siumut Inuit Ataqatigiinnut utoqqatserpoq suleqatigiinnerlu atuutilerseqqinneqarpoq.
Anni Dahl, kommunalbestyrelsemi ilaasortaq, Qeqertarsuarmilu Inuit Ataqatigiinni siulittaasoq, oqarpoq, isumaqatigiissummik unioqqutitsisimannginnami Siumup suleqatigeeqqilernissamik saaffiginnissutaa akuerisimagitsik.