Qeqertarsuaq: Kommunerujussuanngortussat innuttaasut isumalluarfigaat
Arne Broberg-ip Arfivik TV-mik aqutsisuusup avannaani kommunerujussuassap angivallaalernissaa ernumassutigaa, tamaammat isumalluarpallaanngilaq. Qeqqani kommunit tamarmik kattunnissaat ajunnginnerutikkaluarpaa.
Qeqertarsuarnut takornariaqarnerup siuarsarnissaa anguniarlugu avannaani illoqarfiit assigiinngitsut suleqatigiissinnaasut taanna isumaqarpoq, kisiannili innuttaasunut sullissinerup ajorteriarnissaa innutaasulli oqartussaaffikinnerulernissaat ernumassutigai.
Gustav V. Broberg takornariaqarnermut ataqatigiissaarisoq, kommunit kattussuunnissaata tunngaviusumik isumaa ajoriffissaqartinngilaa. Inuussutissarsiornerup takornariaqarnerullu siuarsarnissaat anguniarlugu illoqarfiit suleqatigiissinnaasut isumaqarpoq, aammattaaq kommunalbestyrelsiumaartussap akisussaaffeqarnerulernissaa nuannaarutigaa.
Kommunalbestyrelsimi ilaasortat illoqarfinni assigiinngitsuneersut suleqatigiillaqqissuunissaat innuttaasut oqartussaaqataanerannut apeqqutaasorujussuussangatippaa.
Pavia Olsen Kangerlummi pisiniarfimmi sulisoq illoqarfiit assigiingitsut suleqatigiillernissaat qilanaaraa. Kommunit kattunnerat illoqarfiup siuariartorneranut iluaqutaassasoq isumaqarpoq, suleqatigiinnerullu illoqarfimmi nunaqarfinnilu inuutissarsiornerup sukkanerusumik aalajaannerusumillu ineriartulernissaa qularinngilaa.
Aperineqartut tamarmik isumaqarput kommunit kattuussutsinneqarnissaat pillugu paasititsiniaaneq annikippallaarsimasoq.
