Qatigattuup immua tuluit nunaanni pisiassaalerpoq
Suliffeqarfik MuslceFood.com tuluit nunaanni siullersaalluni qatigattuup immuinik tunisassiortutut imminut naatsorsuuttoq, oqaluttuarpoq qatigattuup immua inuussutissaqarluartoq, tuluit aviisiat The Mirror taama allaaserisaqarpoq.
Qatigattup immuanik pisiniaraanni akissaaqarluartariaqarpoq, tassami immuk literip affaa tuluit aningaasaannik 19 pundinik akeqarpoq koruuninngorlugit 200 koruuninik akeqarami. Taamaalilluni qatigattuup immua niuertarfissuarni tuniniarneqartuni champagnianit akisunerulluni.
Qatigattuup immuanik pisinermi aningaasat atorluarneqassapput, immummik tunisassiortup oqarnera naapertorlugu, qatigattuup immua immummit nalinginnaasumit ajunnginneruvoq kalooriaqannginerugami.
- Qatigattuup immua nalunaaquttap akunneri 48-it matuma siorna niuertarfinni tuniniarneqalerneranit tuniniakkat tamarmik nungunneqarput, pisisartullu qisuariaataat ajunngitsorujussuupput, Darren Beal Muscle.Food.com-imeersoq oqarpoq.
