Qassimiuni ajornartorsiutit Tele-Postip ajuusaarutigai

Qassimiuni attaveqaatit ukiortaamili kipisaqattaalerput. Tele-Post ajusaarluni maanna nalunaaruteqarpoq.

Qassimiuni internettimut, tv-mut oqarasuaatinullu attaveqaatit ulluni kingullerni 17-ini kipisaqattaarput, Tele-Postillu ajornartorsiutaasut iluarsiniarsarisimavai. Taamatullu suliaqarneq sivisuupilussuuvoq ilungersunartupilussuullunilu, aamma iluarsiniarnera suli naammassineqanngilaq, teknikkimut it-mullu pisortaq Jonas Hasselriis taama oqarpoq.

- Ajoqutaasup atuisutsinnut akornusersuutaasimanissaa ajuusaarutigisorujussuuarput. Ajoqut paasineqarniariarmalli sulisuvut sapinngisartik tamakkerlugu Qassimiuni attaveqaatit iluarsiniarlugit suliniarput. Ajoraluartumik teknikerivut silamit unammilligassinneqarput, aamma sumiiffimmi angallassinermut sulinermilu isumannaallisaanermut tunngatillugu, tusagassiorfinnut nalunaarummi taama allappoq.

AAMMA ATUARUK Oqarasuaatit, internet, tv, radiolu ukiortaamili Qassimiuni attaveerussimapput

Tele-Postip aamma ilisimatitsissutigaa atortorissaarutit suli iluarsaanneqartut, tamannalu naammasseriarpat nunaqarfik kipisaqattaanngitsumik avammut attaveqaqqilissasoq. Kingoraartissanik sulisunillu Nuummit kujataanukartitsinissaq maannakkorpiaq sulissutigineqarpoq.