Qasilitsunik seqqartaatit eqqornaveeqqutillu atorneqartalissasut

Qasilitsunik seqqartaatit eqqornaveeqqutillu pinerluuteqarsimasunut inissiisarfinniittunut apriilip aallaqqaataanit atorneqarsinnaalissapput. Folketingip isumaqatigiissup tamanna akuersissutigaa.
februaarip 03-at 2017 08:00
Nutserisoq Simon Uldum -

Qasilitsunik seqqartaatit eqqornaveeqqutillu Danmarkimi parnaarussivinni sakkussatut 2011-imi atorneqarsinnaalerput, danskillu inatsisinik atortitsinermut ministereqarfiata kissaateqarneratigut atorneqarsinnaanerat Nunatsinni aamma atuuttusaanngortinneqarpoq.

Siunnersuut Inuttut Pisinnaatitaaffiit pillugit Nunatsinni Siunnersuisoqatigiinnit isornartorsiorneqarsimavoq, qasilitsunik seqqartaatit sakkutut atorneqarnissaat sakkortuallaarnerarlugit Nunatsinnilu pineqaatissinneqarsimasunut inissiisarfinnut tulluartinnagit.

Tamanna eqqornaveeqqutit atugaalernissaannut aamma atuuppoq. Siunnersuisoqatigiimmi naapertorlugit, aaqqiagiinngissuteqarnermi eqqissisaataananik annertusaaginnarsinnaammata.

Tamannali danskit inatsisinik atortitsinermut ministeriata Søren Pape Poulsenip ilumuunnginnerarpaa. Nunatsinni Pinerluttunik Isumaginnittoqarfimmi pisortap, Naaja Nathanielsenip, siunnersuutigineqartoq aamma taperserpaa, qasilitsunilli seqqartaatit 'mianersuullugit' atorneqartariaqarnerat erseqqissaatigalugu.

Siunnersuut Inatsisartuni amerlanerussuteqartunit ukiaq akuersissutigineqarpoq.

Qasilitsunik seqqartaatit eqqornaveeqqutillu pinerluuteqarsimasunut inissiisarfinni atorneqartarnerinut malittarisassat Nunatsinni Pinerluttunik Isumaginnittoqarfiup aalajangersartussanngorpai.