Nathanielsen: Qasilitsunik seqqartaatinik eqqornaveeqqutinillu atuinermut malittarisassat sukannersuussapput

Nunatsinni pineqaatissinneqarsimasunut inissiisarfinni qasilitsunik seqqartaatit eqqornaveeqqutillu siunissami atorneqarsinnaalernissaat Folketingimi - Inatsisartunit ilalerneqartumik ¬- sapaatit-akunnerata siuliani akuersissutigineqarpoq.

Inatsit apriilip aallaqqaataani atortuulersinneqassaaq, ukiorli 2017 Nunatsinni Pinerluttunik Isumaginnittoqarfiup suleriaatsimut nutaamut piareersaateqarfittut atussagaa, pisortap Naaja Nathanielsenip KNR-imut oqaatigaa.

- Pissaanermik atuinermi periaasissat nassuiaatigalugit nalunaarusiussaagut. Nalunaarummik peqareerpoq, taannali maanna nutarterneqartussanngorpoq. Tamatuma saniatigut sulisut tamarmik eqqornaveeqqutit qasilitsunillu seqqartaatit atornissaannik ilinniartinneqassapput, taamaaliornikkut pissaanermik atuinermi sakkussat atornissaannut malittarisassaqalerlutalu atornissaat piareersimaffigissavarput.

Sulisut sumi qanoq-ilinikkullu qasilitsunik seqqartaatinik qitequtiminniititaqarnissaannut, aamma qanoq-ilinerani sikaavimmut parnaaruteqqasassanersut nalunaarummi malittarisassiuunneqassaaq.

Aamma pineqaatissinneqarsimasunut inissiisarfinni ammasumi Nuummilu pineqaatissinneqarsimasunut inissiisarfittaassap immikkoortuani matoqqasumi qasilitsunik seqqartaatinik eqqornaveeqqutinillu atuinissamut assigiinngitsunik periaaseqartoqassanersoq naqissuserneqassaaq.

Pissaanermik atuinermi sakkut atornissaat periarfissat kingullersarissavaat

Pinerluttunik Isumaginnittoqarfiup iluani nuna tamakkerlugu sulisut katillugit 115-it pissaanermik atuinermi sakkut nutaat marluusut atornissaannik ilinniartinneqassapput. Tamannalu upernaaru ukiarulu pissaaq.

Naaja Nathanielsenilli pissaanermik atuinermi sakkut qaqutigoortupilussuarmik atorneqartarnissaat naatsorsuutiginerarpaa. Inissiisarfimmiittummi aaqqiagiinngissuteqarfiginerata qaangerniarnissaanut iliuusissani qasilitsunik seqqartaatit eqqornaveeqqutillu atornissaat periarfissatut kingullertut atorneqartussaapput. Iliuusissatut siulleq tassaavoq oqaloqatigiinneq, tigusinerlu tulliulluni.

- Qaqutigoortupilussuarmik atorneqarnissaat ilimagaara. Aamma ukiut tamaasa taama pisoqartarnissaa qularaara. Qasilitsunik seqqartaatit eqqornaveeqqutillu atorneqassappata assigiinngitsorpassuit apeqqutaasassapput, pisortaq oqarpoq.

Aaqqiagiinngissuteqarnerit inissiisarfiit nammineerlutik isumagisassavaat

Taamaakkaluartorli sakkut pineqaatissinneqarsimasunut inissiisarfinni atorneqarsinnaanerisa inerteqqutigiunnaarnissaat pissutissaqarsoraa.

- Qaqutigoortupilussuarmik arlaannik pisoqartillugu pissaanermik atuinermi sakkut atorsinnaanissaat ilisimasaqarfiginissaallu pitsaasuuvoq, Naaja Nathanielsen oqarpoq imalu nangilluni:

- Qasilitsunik seqqartaatit ullumikkut atorneqassatillugit politiit aggersartussaavagut. Avataaneersunillu takkuttoqarnera aaqqiagiinngissuteqarneq annerulersiinnarsinnaavaa. Taamaammat isumaqarpugut aaqqiagiinngissuteqarnerit pilernerinit naammassinissaasa tungaanut pinerluttunik isumaginnittoqarfiup iluani nammineerluta iliuuseqarsinnaagutta aaqqiagiinngissuteqarnerit annikillisissinnaassallutigit.

AAMMA ATUARUK Qasilitsunik seqqartaatinik atuisoqalernissaa isornartorsiorneqartoq

Inatsisip allanngortinneratigut aamma nunatsinni pinerluuteqarsimasunut inissiisarfinni pissaanermik atuinermi ajattaaneq inerteqqutaalerpoq. Periaaserli taanna nunatsinni pinerluttunik isumaginnittoqarfiup iluani ukiuni arlaqartuni inerteqqutaareerpoq.

Qasilitsunik seqqartaatit eqqornaveeqqutillu Danmarkimi parnaarussivinni isertitsivinnilu sulisut ajornartoornerminni 2011-imi atorsinnaalerpaat.