VIDEO Qasigiannguani Royal Greenland sulisussaaleqivoq

Royal Greenlandip Qasigiannguani aalisakkanik suliffissuata qalerallit 2,5 tonsit sulisussaaleqineq pissutigalugu igiinnartariaqarsimavai, SIK-llu siulittaasua pisumut tunngatillugu iliuusissaaleqinerarpoq.

Allattoq Sivert Olsen

aggustip 11-at 2015 17:30

Sulisussaaleqineq pissutigalugu qalerallit 2,5 tonsit igiinnarneqartariaqarsimapput.

- Tassa imaappoq, ajoraluartumik sulisut naammattut pissarsiarisinnaasanngilagut ilaatigut, massakkullu piffissami matuma nalaani immikkut ittumik tassa amigaatigivagut sulisut, Royal Greenlandimi sulisoqarnermi ingerlatsisoq Søren Olsen Damgaard oqarpoq.

Maannakkut Qasigiannguanut qalerallit tulaassorneqartut aallaavigalugit inuit 60-it tungaannut amerlassusillit atorfissaqartinneqaraluarput.

- Neriukkaluaratta Qasigiannguani innuttaasut taakkua sulisorisinnaassallutigit amerlanerusut. Ilanngullugu aamma eqqaarusuppara sulisorpassuaqarpugut Qasigiannguani aamma allami sulilluartunik. Taakkua aamma puiorneqassanngillat, Søren Olsen Damgaard oqarpoq.

Qasigiannguanilu sulisussaaleqineq qanoq anigorneqarsinnaanera pillugu Sulinermik Inuussutissarsiuteqartut Kattuffianiit aamma iliuusissaaleqisoqarpoq.

- Maannakkut oqaatigisinnaanngilara qanoq iliortoqartariaqarnersoq taamatut sulisussaaleqineq anigorniarlugu, SIK-p siulittaasua Jess G. Berthelsen oqarpoq.

Aamma atuaruk Qasigiannguit: Sulisussaaleqiffiusumi suliffissaaleqisorpassuit

Qasigiannguani aalisakkanik suliffissuup sulisussaaleqinera SIK-p siulittaasuanit ilisimaneqaraluarpoq, aammalumi nassuiaatissaqartinneqarluni.

- Aappaatigut tupinnanngilaq ukiukkut ilaasortagut eqqarsaatigalugit taartuinnarmi kaperlaffiusumi inissisimasarput, taavalu aasaanerani pilinerit assigisaalu ingerlanneqartarput, timersornerit ingerlanneqartarput, apersortitsinerit ingerlanneqartarput, taamaattumik isumaqarpunga arlaatigut taanna oqaloqatigiinnikkut aaqqiivigineqarsinnaasoq, Jess G. Berthelsen oqarpoq.

Royal Greenlandimiillu kattufinnut kommunimullu oqaloqatigiinnissaq ammaffigineqarpoq, Qasigiannguarmiunummi Royal Greenland suli neriuuteqarpoq.

- Tassa taanna ilumoorpoq. Qanimut minnerunngitsumik kommuni suliffissarsiuussisarfiat SIP-lu soorunami aamma suleqatigerusunnerugaluarparput nalunnginnatsigu aamma Qasigiannguani pissaqarunaraluartugut, kisianni sooq pinerpoq tassa naammattunik sulisunik pissaqanngilagut massakkorpiaq, Søren Olsen Damgaard oqarpoq.

Qasigiannguani suliffissarsiorlutik maannamut 35-it nalunaarsorneqarsimasut Qasigiannguani suliffissarsiuussisarfik ilisimatitsivoq.