Qarasaasiakkut sms-ikkullu digitalimik allagarsisinnaalerputit

Namminersorlutik Oqartussat Digitalimik sullissinermut Aqutsisoqarfiata digitalikkut allagarsisarfik NemPost maanna atulersippaa.
Assi © : Sullissivik.gl
Allattoq Karsten Sommer
marsip 17-at 2016 06:50
Nutserisoq Erna Lynge

Aningaasanik uninngasuutit akiligassalluunniit allakkatigut frimærkilerlugit nassiuttakkat ilisimaneqartut digitalinit taarserneqalerput. Tamakku Nunatsinnut isorartuumut naleqquttuupput.

Kalaallit Nunaat inuiaqatigiinnut digitalinik atuinissamut pilersaaruteqarpoq, tassungalu NemPost ilaavoq. Innuttaasunik sullissivimmut Sullissivik.gl-imut nalunaarnikkut ilannguttoqarsinnaavoq, imaluunniit Androiddikkut iPhonekkulluunniit NemPost-appi aqqutigalugu.

Allakkanik nakkartitsivimmut digitaliusukkut allagarsigaanni e-mailisisoqassaaq.

Allagarsiatit pingaaruteqartutut nassitsisup nalilerpagit aamma oqarasuaatikkut SMS-isissaatit. Aammattaaq aningaasarsiavit allagartai, kommunimit allagarsiatit allakkallu allat pingaaruteqartut allakkanik nakkartitsivinnut digitaliusumut ingerlaannaq isertassapput - taannalu ulloq unnuarlu ammasarpoq.

Iluatsilluartumik misilittarneqareerpoq

Periarfissaq taanna qaammatini kingullerni qulini assorsuaq iluatsittumik aalisakkanik suliffissuarmi Halibut Greenlandimi misiligarneqarsimavoq.

Assersuutigalugu aalisartut tunisaminnik isertitaat inuttaannut SMS-ikkut nalunaarutigineqartarput, paasissutissallu pingaaruteqartut soorlu pisassiissutit assigisaallu aamma nalunaarutigineqartarlutik.

Misiligaanerup nalaani Halibut Greenlandip SMS-ikkut nalunaarutit 16.000-it aallartissimavai, aqutsisoqarfimmullu saaffiginnissutit appariartissimallugit; aammalu ullut sullivissat aaqqissuuneri eqaannerulersillugit.
--
Halibut Greenlandimik assersuutip takutippaa NemPostimik atuineq tamanit pissarsissutaasoq. NemPostillu atorneqarnerata inuiaqatigiinni tamanut siammarnissaa qilanaaraara Randi Vestergaard Evaldsen, aningaasaqarnermut aatsitassanullu naalakkersuisoq oqarpoq.