Siumut: Qaqugu naalagaaffinngornissaq oqallisigaat
Siumumi aallartitat 68-usut gruppikkaarlutik sulinertik ippassaq aallartitartik ullaaq manna nangeqqippaat.
Siumumi siulersuisuunerit kiisalu Siumup immikkoortortaoqarfiisa partiip politikkikkut anguniagassaatut siunnersuutaat eqimattanut sisamanut avillutik oqallisigaat.
AAMMA ATUARUK Namminiilivinnissaq Siumumit ullulerusunneqartoq
AAMMA ATUARUK Siumut namminiilivinnissamut aqqutissiuussissaaq
Qulequttat oqallisigineqartut oqimaannerit immaqalu pingaarnerit siunnersuusiorfigisassaaat ukupput:
Siullertut namminiilivinnissamik oqalukkunnaarluni Naalagaaffinngornissamik oqalulernissaq oqallisigineqarpoq. Aamma Nunatta aningaasaqarnikkut imminut napatissinnaanissaa eqqarsaatigalugu partiip politikkia qanoq imaqassanersoq oqallisigineqarpoq.
Nunatta aaqqissuussaanerata oqallisigineqarnera aamma inituvoq, tassani mittarfiit, aqqusernit anngallannerlu ilaatigut oqallisigineqarlutik.
Aamma Nunatta naalagaaffinngornissaanik ulluliinissaq, Siumut iluani kissaatigineqarlunilu akerlerineqartoq oqallisigineqarpoq.
Tamakkuupput Siumut politikkikkut anguniagassaanut ilanngunneqartussat. Qulequttat taakku oqallinnermi initupput, oqallinnerlu sakkortusinnaasarluni.
