Kommandørkaptajni: Qaqqap nakkaaqqajaasup eqqaani pisoqanngikkallarpoq
Umiarsuup alapernaasartuutip Vædderenip innaarsummi annertuumik kaanngaqqasoq nakkaassagunilu tassaartitsingaatsiarsinnaasoq nakkutigisigimavaa.
Taamaattoqarneranilli maannakkumut suli takussutissartaqanngitsoq, umiarsuarmi alapernaarsuummi, Vædderenimi pisortaq, kommandørkaptajnilu, Søren Kjeldsen oqarpoq.
- Qaqqamit allanik nakkaasoqarsimanersoq takusaqanngilagut. Maannamut maani nipaassimavoq, Søren Kjeldsen oqarpoq.
Karrat Kangerluani qaqqap kaanngaqqajaasup, kaanngaruni nutaamik tassaarsuaqartitsisinnaasup nakkutiginissaa Vædderenip suliassaasa ilagaat.
- Qaqqap ilamernga kaanngaruni imaanut nakkaassaasinnaavoq. Taamaammat piffimmi suli aarlerinartoqarpoq, naalagaaffiup GEUS-imi ujarassiuua, Stefan Bernstein naliliilluni oqarpoq.
Mallit minutsit 45-t ingerlaneranni Uummannamut anngukkumaartut
Innaq kaanngangajaqqasoq arfininngormat kaanngarluni tassaartitsisup angeqqatigipajaaraa, Bernstein oqarpoq. Issittumi Sakkutooqarfiup innaq 300 x 1100 meterit missaannik annertussusilittut nalilerpaa, taannalu Karrat Kangerluanni qaqqami 2000 meterisut portutigisumi, 1000 meterinik qatsitsigisumiippoq.
Innaq imaanut nakkaappat malissuit pilersinneqartut minutsit 45-t ingerlaneranni Uummannamut apuutissasut upalungaarsimasussaatitaasut naatsorsuutigaat. Qaasuitsup Kommuniata tusagassiortunut nalunaarutaanni tamanna allassimavoq:
- Taamaalilluni kalleriisoqarniariarpat innuttaasut qullarternissaminnut piffissaqarluartussaassallutik, kommuni tusagassiutinut allappoq.
Qaqqaq nakkaasimasoq nunap sajunneranit pilersinneqarsimanersoq ilisimatuut suli qulakkiinngilaat:
- Nuugaatsiami uuttortaavimmi malugineqarsimasut nunap sajunneranik qaqqaq nakkaasimanersoq, qaqqalluunniit nakkaaneranit nuna sajutsinneqarnersoq geofysikerit suli nalornissutigaat, GEUS-imit Stefan Bernstein nassuiaavoq.
