NALILIINEQ Qaqortumi mittarfiliornissaq pillugu nalunaarusiaq isumallualersitsinngilaq
Peqqissutsimulli Attaveqarnermullu Naalakkersuisoqarfiup nalunaarusiaa, siorna juunip qaammataanili naammassineqartoq isumallualersitsivallaanngilaq.
Nalunaarusiami INUPLAN A/S-imit Grontmijimillu suliarineqartumi, Qaqortumi mittarfimmik meterinik 1199-inik takutigisumik sanaartortoqassappat Kujataani innuttaasunut tamanna qanoq kinguneqassanersoq allaaserineqarpoq.
Nalunaarusiami periarfissat marluk aallaavigineqarput. Siullermi, Narsarsuaq matuneqassaaq, Narsarsuarmiut nuutsinneqarlutik nunaqarfiullu pilersorneqarnera unitsinneqarluni. Aappaanilu, Narsarsuaq suluusalinnut mittarfittut atorneqarunnaarluni qulimiguulinnut mittarfinngortinneqassaaq nunaqarfiullu pilersorneqarnera kiffartuussinissamik isumaqatigiissutit atorlugit ingerlaannarluni.
AAMMA ATUARUK Qaqortumi timmisartunut mittarfeqalernissaq inatsisartunut qineqqusaarnermi
Tamanna Narsarsuarmi suliffissat ikilinerinik kinguneqassaaq, Qaqortumi mittarfittaassami atorfiit 27-nnaat pilersinneqarnissaat naatsorsuutigineqarmat, Narsarsuarmi mittarfimmi pioreersumi sulisorineqartut 80-iusut.
Eqqugaanerpaajusussallu tassaapput Narsarsuarmiut.
Nunaqarfik matuneqassappat najugaqartut Qaqortumut nuuttariaqassapput. Narsarsuarlu qulimiguulinnut mittarfittuinnaq atorneqalissappat, mittarfimmi sulisut ilaat atorfigisatik annaajumanagit Qaqortumut nuuttariaqassapput, allallu suliffigisatik mittarfimmut pioreersumut attuumassuteqarmata aamma nuuttariaqassallutik.
Ineqarnermut, suliffissaqartitsinermut atuartitsinermullu tunngatillugu nalorninartoqarsinnaanera nalunaarusiami aamma sammineqarpoq.
Atlantiku ikaarlugu toqqaannartumik timmisartuussisarnerit unissapput
Takornariartitsinikkullu isertitarpassuarnik nassataqarnissaanik naatsorsuutigisaqaraanni aamma pakatsisoqassaaq.
Nalunaarusiarmi naapertorlugu, mittarfik meterinik 1199-inik takitigisussatut pilersaarutigineqartoq atlantiku ikaarlugu toqqaannartumik timmisartuussisoqarunnaarneranik kinguneqassaaq. Tamannalu takornariartitsinerup 19-30 procentinik appariaateqarfiuneranik kinguneqassangatinneqarpoq.
Aatsitassarsiorluni suliffissuaqarnermut tunngatillugu - pingaartumik Kuannersuarni suliniutaasoq piviusunngussappat - Greenland Minerals and Energy (GME) naapertorlugu, sulisussat nunanit allaneersut timmisartut atorlugit angallanneqarnissaannut tamanna ajornakusoortitsissaaq.
Taamaattorli Qaqortumi mittarfiliortoqarneratigut Kujataani napparsimasunik angallassisarneq malunnaatilimmik pitsanngoriaateqarfiussaaq.
AAMMA ATUARUK Qaqortumi mittarfissap tungaanut aqqusinissaq aallartinneqarpoq
Aamma mittarfik pisortanut iluaqutissartaqassaaq, pisortat kiffartuussinissamik isumaqatigiissutinut aningaasartuutaat ikinnerulissammata aammalu Qaqortumit nunatsinni sumiiffinnut allanut sulinermut atatillugu angalasarnernut pisortat aningaasartuutigisartagaat ikinnerulissallutik.
Nalunaarusiaq kingunerluutaasinnaasut annikillisarnissaannut aamma siunnersuuteqarfiuvoq. Ilaatigut mittarfimmik meterinik 600-nik takinerusumik sanaartortoqarneratigut atlantiku ikaarlugu timmisartuussinerit anguneqarsinnaassapput, taamaaliornikkullu takornariartitsineq annikinnerusumik eqqugaassalluni.
