Qaqortumi biilinik aallarussisoq ajunaartoq
Politiit Kujallermi immikkoortartaqarfiani aqutsisup Laila Fleischerip nalunaaqutaq 15:25 nalunaarutigaa biilit Qaqortumi biilit uninngavigisartagaanit aallarunneqarsimasut.
Politiit ornigutereerlutik naammattoorpaat angut biilinik aallarussisoq.
Politiit siggartaat kalerrisaarut atorlugu aallarussisoq uneqqusimagaluarpaat, aquttorli unikkumasimanngilaq.
Aallarussisoq sukkalisaarluni qimaavoq, Vatikanbakkikkullu ingerlaartilluni nivattaassuarmut aporluni ajutoorpoq.
Politiit apuukkamik nakorsamik aggersaapput, angutilli 36-nik ukiullip inuunera annaanneqarsinnaasimanngilaq.
Ilaqutaasut ilisimatinneqareertut. Laila Fleischer oqarpoq.
Kujataani politiit pingasunngornermi biilinik aallarussisoqarneranut nivattaassuarnillu apuinermut atatillugu takunnissimasunik ujaasipput.
Innuttaasut takusaqarsimagunik arlaatigulluunniit ilisimasaqarunik politiit oqarasuaataannut 701448-mut sianerlutik saaffiginninnissaat politiinit kaammattuutigineqarpoq.
Ajunaartoqarneranik takunnissimasut ikiorserneqarnissamik pisariaqartitsisut Qaqortumi inunnik isumaginnittoqarfimmut 493435-mut 253534-mulluunniit sianersinnaapput.
